بوكستان الەمنىڭ ەكى دۇركىن چەمپيونى، وليمپيادا چەمپيونى ءارى باركەر كۋبوگىنىڭ يەگەرى سەرىك ساپييەۆ ۋنيۆەرسياداعا كەلگەن شەتەلدىك دەلەگاسيالار مەن ەرىكتىلەر ورنالاساتىن اتلەتيكا اۋىلىنىڭ مەرى بولىپ تاعايىندالدى، دەپ حابارلايدى Baq.kz جارىستاردى ۇيىمداستىرۋ كوميتەتىنىڭ باسپا ءسوز قىزمەتىنە سىلتەمە جاساپ.
«اتلەتيكا اۋىلىنىڭ مەرى بولۋ جانە وسىنشالىقتى اۋقىمدى سپورتتىق شاراعا كىشكەنە بولسا دا ۇلەس قوسۋ – مەن ءۇشىن ۇلكەن قۇرمەت، سونىمەن قاتار جاۋاپتى قىزمەت. تاياۋدا الماتىداعى ۋنيۆەرسياداعا قاتىسۋ ءۇشىن كوپتەگەن سپورتشى كەلەدى. ولار سايىستارعا ءتۇسىپ، كىم مىقتىنى انىقتايدى، جوعارى سپورتتىق ناتيجەسىن پاش ەتەدى. اتلەتيكا اۋىلىندا ولاردى جىلى جۇزدەسۋلەر، جاڭا دوستار كۇتىپ تۇر»، – دەدى سەرىك ساپييەۆ.
اتلەتيكا اۋىلىنىڭ مەرى دەلەگاسيالاردى قارسى الىپ، قۇتتىقتاۋ جانە تۋ كوتەرۋ سالتاناتتارىنا قاتىساتىن بولادى. سونىمەن قاتار سپورتشىلار مەن قوناقتاردىڭ جايلى ءومىر ءسۇرىپ، تىنىعۋىنا بار جاعدايدى جاساۋ دا اكىمنىڭ مىندەتىنە كىرەدى.
اتلەتيكا اۋىلىنا 3000-نان استام ءتۇرلى دەلەگاسيا وكىلدەرى ورنالاستىرىلادى دەپ كۇتىلۋدە. وندا رەسەي، ۋكراينا، وڭتۇستىك كورەيا، جۇڭگو، اقش جانە وزگە دە ەلدەردەن كەلگەن 100-گە تارتا ەرىكتى تۇرادى. باس جوسپارعا سايكەس، اتلەتيكا اۋىلىنا 5000 ادام سيادى.
اتلەتيكا اۋىلىنىڭ اشىلۋ سالتاناتى 24 قاڭتاردا وتەدى.
