Bokstan álemniń eki dúrkin chempiony, Olimpiada chempiony ári Barker Kýbogynyń iegeri Serik Sápiev Ýniversiadaǵa kelgen sheteldik delegatsiialar men eriktiler ornalasatyn Atletika aýylynyń meri bolyp taǵaiyndaldy, dep habarlaidy Baq.kz jarystardy uiymdastyrý komitetiniń baspasóz qyzmetine silteme jasap.
«Atletika aýylynyń meri bolý jáne osynshalyqty aýqymdy sporttyq sharaǵa kishkene bolsa da úles qosý – men úshin úlken qurmet, sonymen qatar jaýapty qyzmet. Taiaýda Almatydaǵy Ýniversiadaǵa qatysý úshin kóptegen sportshy keledi. Olar saiystarǵa túsip, kim myqtyny anyqtaidy, joǵary sporttyq nátijesin pash etedi. Atletika aýylynda olardy jyly júzdesýler, jańa dostar kútip tur», – dedi Serik Sápiev.
Atletika aýylynyń meri delegatsiialardy qarsy alyp, quttyqtaý jáne tý kóterý saltanattaryna qatysatyn bolady. Sonymen qatar sportshylar men qonaqtardyń jaily ómir súrip, tynyǵýyna bar jaǵdaidy jasaý da ákimniń mindetine kiredi.
Atletika aýylyna 3000-nan astam túrli delegatsiia ókilderi ornalastyrylady dep kútilýde. Onda Resei, Ýkraina, Ońtústik Koreia, Qytai, AQSh jáne ózge de elderden kelgen 100-ge tarta erikti turady. Bas josparǵa sáikes, Atletika aýylyna 5000 adam siiady.
Atletika aýylynyń ashylý saltanaty 24 qańtarda ótedi.
