2025 جىلدىڭ 31 تامىزىنان باستاپ تاسىمالداۋشىلار ۇشاقتارعا، پويىزدارعا جانە تەڭىز كولىگىنە ساتىپ الىنعان جانە بروندالعان بيلەتتەر تۋرالى مالىمەتتەردى قۇقىق قورعاۋ جانە ارنايى مەملەكەتتىك ورگاندارعا جولداپ وتىراتىن بولادى. وسى سيپاتتاعى بۇيرىققا كولىك ءمينيسترىنىڭ مىندەتىن اتقارۋشى ماقسات قالياقپاروۆ قول قويدى، دەپ حابارلايدى Dalanews.kz.
جاڭا ەرەجەلەرگە سايكەس، تاسىمالداۋشىلار مەملەكەتتىك ورگاندارعا جولاۋشىلار تۋرالى مالىمەتتەردى ۇسىنۋعا مىندەتتى.
ۇسىنىلاتىن مالىمەتتەر تىزبەسىنە مىنالار كىرەدى: تەگى، اتى، اكەسىنىڭ اتى (بار بولسا)، تۋعان كۇنى، جىنىسى، ازاماتتىعى، كۋالاندىرۋشى قۇجاتتىڭ دەرەكتەرى، ءجۇرۋ باعىتى، باگاج تۋرالى مالىمەتتەر، تولەم نىسانى، ورىن ءنومىرى، سونداي-اق جولاۋشى كەلىسىمىمەن ونىڭ بايلانىس دەرەكتەرى.
بيلەتتەردى ساتۋ كەزىندە جولاۋشىلاردىڭ دەربەس دەرەكتەرىن جيناۋعا جانە وڭدەۋگە مىندەتتى تۇردە كەلىسىمى الىنادى. مالىمەتتەردى بەرۋ قۇقىق قورعاۋ جانە ارناۋلى مەملەكەتتىك ورگانداردىڭ اقپاراتتىق الماسۋ جۇيەسى نە ولاردىڭ بازالارىمەن تىكەلەي ىقپالداسۋ ارقىلى جۇزەگە اسىرىلادى. بارلىق ۋاقىت پارامەترلەرى استانا ۋاقىتى بويىنشا بەلگىلەنەدى. تەحنيكالىق اقاۋلار بولعان جاعدايدا، اقپارات الماسۋعا قاتىسۋشىلار ماسەلەنى جەدەل جويۋعا مىندەتتى.
اۋە تاسىمالى. اقپارات ەكى رەت بەرىلەدى: ۇشۋدان 48 ساعات بۇرىن جانە تىركەۋ اياقتالعاننان كەيىن 30 مينۋت ىشىندە. بۇل مىندەت قازاقستانعا جانە ەلىمىزدەن رەيستەر ورىندايتىن شەتەلدىك اۆياكومپانيالاردى قوسا العاندا، بارلىق اۋە كومپانيالارىنا جۇكەتەلەدى. وعان دەربەس دەرەكتەر، بيلەت، مارشرۋت، سالونداعى ورىن، باگاج جانە تولەم تۋرالى مالىمەتتەر كىرەدى.
تەمىرجول تاسىمالى. جولاۋشىلار تۋرالى دەرەكتەر "ەكسپرەسس" ابج جۇيەسى ارقىلى كەلىپ تۇسەدى جانە قۇجات، مارشرۋت، ورىن، سونداي-اق ساتىپ الىنعان جانە بروندالعان بيلەتتەر تۋرالى اقپاراتتى قامتيدى. اقپاراتتى ۇسىنۋ كۇنىنە بەس رەت جۇزەگە اسىرىلادى.
تەڭىز تاسىمالى. تاسىمالداۋشىلار، شەتەلدىكتەردى قوسا العاندا، قازاقستانعا تەڭىز كولىگىمەن كەلەتىن جولاۋشىلار تۋرالى دەرەكتەردى ۇسىنۋعا مىندەتتى. مالىمەتتەر ۋاكىلەتتى ورگاندارعا تاۋلىگىنە ءتورت رەت ۇسىنىلادى: كەمەلەردىڭ كەلۋ جانە كەتۋ كەستەسىنە بايلانىستى بەرىلەدى. دەرەكتەر بيلەتتى تەڭىز ۆوكزالىنىڭ كاسساسىنان ساتىپ العاندا نەمەسە بيلەت ونلاين ساتىلعان كەزدە تىركەلەدى.
بۇيرىق 2025 جىلدىڭ 31 تامىزىندا كۇشىنە ەنەدى.
