قالعان تۇرعىندار الداعى ۋاقىتتا كوشەتىن اۋداندارىن تاڭداپ، كەزەڭ-كەزەڭىمەن سولتۇستىككە قونىس اۋدارماق. بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە تۇركىستان وبلىستىق ءماسليحاتىنىڭ دەپۋتاتى جاڭاباي اعابەكوۆ ءمالىم ەتتى.
2016 جىلدان بەرى سولتۇستىككە كوشتىڭ جاندانۋىنا اتسالىسىپ جۇرگەن حالىق قالاۋلىسى جاڭاباي مولداباي ۇلى بۇل جولى دا ءوڭىر تۇرعىندارىنىڭ تەرىسكەيدەگى تىرشىلىكپەن تانىسىپ قايتۋىنا جاعداي جاساپ، قولداۋ كورسەتتى. سپيكەردىڭ ايتۋىنشا، وسىنداي تانىمدىق ساپارلار الداعى ۋاقىتتا دا جالعاسادى.
– جاقىندا تۇركىستان وبلىسى اكىمدىگىنىڭ قولداۋىمەن وسى كوشتىڭ باسى-قاسىندا جۇرگەن ۇلتجاندى ازامات بۋراحان داھانوۆ وڭىرىمىزگە كەلىپ، ونىمەن بىرگە ءبىر اپتاداي تۇسىندىرمە جۇمىستارىن جۇرگىزدىك.
بۇل باعىتتاعى جۇمىستار ناتيجەسىز ەمەس. سولتۇستىكتىڭ جەرى قۇنارلى، وندا جۇمىس كوپ، مامان تاپشى. ءبىزدىڭ ءوڭىردىڭ ەڭبەكقور حالقى سولتۇستىككە دە تەز بەيىمدەلىپ جاتىر.
بىرنەشە جىل بۇرىن تەرىسكەيدەگى جابىلعالى تۇرعان مەكتەپ وڭتۇستىكتەن كوشىپ بارعان 50 شاقتى وقۋشىنىڭ ارقاسىندا جۇمىسىن جالعاستىرىپ، اۋىلدىڭ اجارى ارتتى. قازاق ەلىنىڭ ءاربىر جەرى قاستەرلى. قولىنان ءىس كەلەتىن، مال باعۋعا، ەگىستىكپەن اينالىسۋعا ەبى بار ءوڭىر تۇرعىندارىن سولتۇستىككە قونىس اۋدارۋعا شاقىرامىن، – دەدى ول.
بريفينگ بارىسىندا ءسوز العان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى نۇرجان نۇراشوۆ 2015 جىلدان بەرى جۇمىس كۇشى ازايعان سولتۇستىك وڭىرلەرگە حالقى تىعىز ورنالاسقان وڭتۇستىك ايماقتارىنان حالىقتى كوشىرۋ جۇمىستارى جۇيەلى جۇرگىزىلىپ جاتقانىن ايتىپ ءوتتى.
باسقارما وكىلىنىڭ بايانداۋىنشا، 2015-2022 جىلدار ارالىعىندا سولتۇستىككە وڭىرىمىزدەن 11 892 ادام قونىس اۋدارعان. ال، وسى جىلدىڭ 5 ايىندا وبلىستان 206 وتباسى، ياعني 691 ادام كوشىپ بارعان.
«ەڭبەك جانە حالىقتى الەۋمەتتىك قورعاۋ مينيسترلىگى 2023 جىلعا رەسپۋبليكا بويىنشا 6727 كۆوتا ءبولدى. قونىس اۋدارۋشىلار ءۇشىن مەملەكەتتىك قولداۋ كورسەتەتىن 8 وبلىس بەلگىلەنگەن. ولار – اباي، اقمولا، قاراعاندى، قوستاناي، پاۆلودار، ۇلىتاۋ، سولتۇستىك جانە شىعىس قازاقستان وبلىستارى. بيىل 19-21 ءساۋىر ارالىعىندا تۇركىستان وبلىسىنىڭ 9 اۋدانىندا ەلىمىزدىڭ سولتۇستىك-شىعىس 4 ايماقتارىنىڭ وكىلدەرىنىڭ قاتىسۋىمەن «قونىس اۋدارۋ» جارمەڭكەلەرى، «Amanat» پارتياسىنىڭ تۇركىستان وبلىستىق فيليالى وكىلدەرىمەن بىرگە حالىقپەن كەزدەسۋلەر وتكىزىلدى.
ناتيجەسىندە، 509 وتباسى قونىس اۋدارۋعا نيەت ءبىلدىردى، ونىڭ ىشىندە 100-دەن اسا ازامات وڭ شەشىم قابىلدايتىنىن جەتكىزگەن»، - دەدى نۇرجان نۇراشوۆ.
بريفينگ بارىسىندا سولتۇستىك قازاقستان وبلىسى، شال اقىن اۋدانى، ەڭبەك اۋىلىنا كوشىپ بارۋعا شەشىم قابىلداعان ساۋراندىق ءادىلحان جۋمادۋللا تەرىسكەيگە كوشتىڭ ءتيىمدى تۇستارى جايلى پىكىرىن ءبىلدىردى. ول سولتۇستىككە قونىس اۋدارۋشىلار ءۇشىن تۇرعىن ۇيلەردىڭ باعاسى قولجەتىمدى ءارى مال شارۋاشىلىعىنا ىڭعايلى ەكەنىن تىلگە تيەك ەتتى. اۋىلدىڭ الەۋمەتتىك جاعدايى دا كوڭىلىنەن شىققان.
– سولتۇستىكتەگى اعايىن ىستىق ىقىلاسپەن قارسى الىپ، قولداۋىن كورسەتىپ جاتىر. الداعى ۋاقىتتا وندا ءىرى قارا مال باعىپ، وسى شارۋاشىلىقتى دامىتۋعا كۇش سالماقپىن.
مەن بارعان شال اقىن اۋدانىندا بالىق شارۋاشىلىعىمەن دە اينالىسۋعا مۇمكىندىك مول. اۋداندا 17 كول بار ەكەن. بولاشاقتا كولدىڭ ەمدىك بالشىعىنىڭ نەگىزىندە ساناتوريي اشۋعا نيەتتىمىن. وسى ساپار ناتيجەسىندە ءوزىم 15 شاقتى وتباسىعا قۇجاتتارىن راسىمدەۋگە كومەكتەسىپ، سولتۇستىككە الىپ بارا جاتىرمىن، – دەدى ول.
ودان بولەك، سولتۇستىككە كوشۋگە نيەتتى كەلەس اۋدانىنىڭ تۇرعىنى مۇحامەدجان الدياروۆ تا مال شارۋاشىلىعىنا لايىقتى ەلدىمەكەندى تاڭداپ، الداعى اپتادا كوشۋگە دايىن ەكەندىگىن جەتكىزدى. سونداي-اق، ول كوشىپ بارعان سوڭ سولتۇستىك جۇرتىنا ۇلتتىق سپورت ءتۇرى كوكپاردى ناسيحاتتاپ، دامىتقىسى كەلەتىندىگىن ايتتى.
