قازاقستان پرەزيدەنتى قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا "سامۇرىق-قازىنا" ۇلتتىق ءال-اۋقات قورىن رەفورمالاۋ بارىسىنا كوڭىلى تولمايتىنىن جەتكىزدى، دەپ حابارلايدى Dalanews.kz.
"سامۇرىق-قازىنا" الدىنا قويىلعان باستى مىندەت – قوردى رەفورمالاۋ. دەسە دە بۇل باعىتتا جۇرگىزىلىپ جاتقان جۇمىستىڭ ناتيجەسىن تابىستى دەپ ايتۋعا كەلمەيدى. ارينە، ءبىرشاما ىلگەرىلەۋ بار، ءبىراق اتقارار ءىس ءالى دە اۋقىمدى. ءبىز اقپان ايىندا قوردىڭ قىزمەتىن ارنايى تالقىلايتىن بولامىز" – دەدى توقايەۆ.
ايتا كەتسەك، "سامۇرىق-قازىنا" اق 2008 جىلى قۇرىلعان. قوردىڭ باسقارۋىندا Air Astana، "قازاقتەلەكوم"، "قازاتومونەركاسىپ"، "قازمۇنايگاز"، "قازپوشتا"، "قازاقستان تەمىر جولى" جانە KEGOC سياقتى ەلدەگى ستراتەگيالىق ماڭىزى بار ءىرى كومپانيالار بار. پرەزيدەنتتىڭ ايتۋىنشا، ولاردى جاڭعىرتۋ مەن تيىمدىلىگىن ارتتىرۋ – ەكونوميكانىڭ وسىمىنە ىقپال ەتەتىن ماڭىزدى شارالاردىڭ ءبىرى بولماق.
Arasha-داعى ارىپتەستەرگە سۇقبات بەرگەن ەكونوميست ساپارباي جوبايەۆتىڭ ايتۋىنشا، "سامرۇق-قازىنانىڭ" كاسىپورىندارى مەملەكەتتىڭ ىشىندەگى مەملەكەت بولىپ العان.
"مەملەكەتتىك مەنشىك بولعاننان كەيىن سالىق تولەۋدىڭ ورنىنا، بيۋدجەت جاردەم الىپ وزدەرىنىڭ جەكە تابىستارىن، جەكە مۇددەسىن جوعارى قويادى. سەبەبى بارلىق جەردە مەملەكەتتىك مەنشىك دەگەن ءسوز ول ەشقاشان ءبىر ءتيىمدى ىستەۋ مۇمكىن ەمەس. ماسەلەن، قازاقستاندا مۇناي بيزنەسىمەن امەريكانىڭ كومپانياسى "تەڭىزشيەۆرويل" شۇعىلدانادى. ول 24-25 ميلليون توننا مۇناي وندىرەدى. ءبىزدىڭ بيۋدجەتىمىزگە 2-2،5 تريلليون تەڭگە سالىق تولەيدى. ال ءدال سونشا كولەمدە مۇناي وندىرەتىن "قازمۇنايگاز" بار بولعانى 1،169 ميلليارد تەڭگەلىك سالىق تولەيدى. "سامۇرىق- قازىنانىڭ" تيىمدىلىگى وتە تومەن. 51 مەملەكەتتىك ۇلكەن كاسىپورىنداردى الساق سونىڭ 14ء-ى بۇگىنگى كۇندە تابىسسىز جۇمىس ىستەيدى. ياعني مەملەكەتتىك بيۋدجەتتەن جاردەم الىپ وتىر. ولاردى تەزىرەك جەكەشەلەندىرۋ كەرەك"، - دەيدى ول.
