"سامۇرىق-قازىنا" ۇلتتىق ءال-اۋقات قورى "بايتەرەك" حولدينگىنە 50 ملرد تەڭگە سوماسىندا زاەم بەرەدى. بۇل تۋرالى KASE سايتىندا اقپارات پايدا بولدى. وندا بۇل قاراجاتتىڭ ەكونوميكانىڭ باسىم سالالارىن قارجىلاندىرۋعا جۇمسالاتىندىعى ايتىلادى. اقشا تەڭگە تۇرىندە بەرىلەدى. قارىزدى قايتارۋ مەرزىمى 30 جىلدى، جىلدىق سىياقى مولشەرلەمەسى 0،1% قۇرايدى، دەپ حابارلايدى Dalanews.kz.
سىياقى تولەۋ جىلىنا ءبىر رەت، ءاربىر 12 اي سايىن، ال نەگىزگى بورىشتى وتەۋ – قارىز مەرزىمىنىڭ سوڭىندا جۇزەگە اسىرىلاتىن بولادى.
"سامۇرىق-قازىنا" قورى مەن "بايتەرەك" حولدينگىءنىڭ جالعىز اكسيونەرى قازاقستان ۇكىمەتى بولىپ تابىلادى. ناۋرىز ايىندا "بايتەرەك" 2025 جىلى كاسىپكەرلىكتى قولداۋعا، تۇرعىن ءۇي قۇرىلىسىن دامىتۋعا جانە ينۆەستيسيالىق جوبالاردى ىسكە اسىرۋعا 8 ترلن تەڭگە بولەتىنىن حابارلادى. 2027 جىلعا قاراي قارجىلاندىرۋ كولەمى 10 ترلن تەڭگەگە دەيىن ۇلعايادى.
ءساۋىر ايىندا "بايتەرەك" ءىرى بيزنەس ءۇشىن، ال "دامۋ" قورىنىڭ (ونىڭ ەنشىلەس قۇرىلىمى) اياسىندا شاعىن جانە ورتا بيزنەس ءۇشىن كەپىلدىك قورلارىن ىسكە قوستى.
سونىمەن قاتار، "بايتەرەك" ەنەرگەتيكا مەن كوممۋنالدىق شارۋاشىلىقتى جاڭعىرتۋدىڭ 2025-2029 جىلدارعا ارنالعان ۇلتتىق جوباسىنىڭ قارجى وپەراتورى بولىپ تابىلادى. ال بۇل ماقساتتارعا 4،7 ترلن تەڭگە باعىتتاۋ جوسپارلانىپ وتىر.
