وسكەمەن قالاسىندا وتكەن «تۋعان جەر» فورۋمىندا «مەنىڭ مەكتەبىم» جوباسى ىسكە قوسىلدى. اتالمىش جوبا اياسىندا شقو مەكتەپتەرىنىڭ حيميا، فيزيكا، بيولوگيا، روبوتوتەحنيكا سىنىپتارى زاماناۋي تەحنيكالارمەن جابدىقتالماق.

«تۋعان جەر» فورۋمىنا قاتىسقان ايماق باسشىسى جوبامەن تولىقتاي تانىسىپ، بالانىڭ دۇنيەتانىمىن ەرتە جاستان قالىپتاستىرۋ ءۇشىن جاعداي جاساۋ قاجەتتىگىن ايتىپ ءوتتى. جوبا بويىنشا، ورتا ءبىلىم وشاقتارىنىڭ سىنىپتارى نازاربايەۆ زياتكەرلىك مەكتەبىندە ورناتىلعان تەحنيكالار سىندى جاڭا قۇرال-جابدىقتارمەن قامتىلماق.

–  ءبىز نازاربايەۆ زياتكەرلىك مەكتەبىنىڭ وقۋ تاجىريبەسىن جانە كورسەتكىشتەرىن تولىقتاي زەرتتەپ، قورىتىندى شىعاردىق. قازىردە وبلىستاعى 277 مەكتەپتە 425 سىنىپتى جاڭاشالاندىرىپ، قۇرال-جابدىقتار ورناتۋ قاجەت. سونىڭ ىشىندە، 38 فيزيكا سىنىبىن، 37 حيميا، 78 بيولوگيا، 272 روبوتوتەحنيكا سىنىپتارىن جالپى قۇنى 2،8 ملرد تەڭگەگە جابدىقتايمىز، – دەدى وبلىس باسشىسى دانيال احمەتوۆ.

ءقازىردىڭ وزىندە ءبىلىم سالاسىنا قولداۋ كورسەتىپ جاتقان كاسىپكەرلەر از ەمەس. شەمونايحا اۋدانىندا ورنالاسقان «ۆىدريحينسكوە» ج ش س باسشىسى الەكساندر بەلكين ءوز قاراجاتىنا ۆىدريحا اۋىلدىق ورتا مەكتەبىنىڭ سىنىبىن روبوتوتەحنيكا سىنىبىمەن جابدىقتادى. ال زايساندىق كاسىپكەر، «بوتا» شارۋا قوجالىعىنىڭ باسشىسى قاراتال اۋىلدىق ورتا مەكتەبىنىڭ گەوگرافيا سىنىبىن جابدىقتاۋعا قولداۋ كورسەتكەن.

فورۋم بارىسىندا شقو اكىمى دانيال احمەتوۆ ايتىپ وتكەندەي، ءبىلىم سالاسىنا بولىنگەن ينۆەستيسيا – مەملەكەت دامۋىنىڭ كەپىلى.

شقو اكىمىنىڭ باسپا ءسوز قىزمەتى

 

https://dalanews.kz/30625