تۋعان جەرگە دەگەن تارتۋلاردىڭ ءبىرىن رۋحاني جاڭعىرۋ باعدارلاماسى اياسىندا جەكە كاسىپكەر ەسبول قامباروۆ وتىرار اۋدانىنداعى اقتوبە اۋىلىندا زاماناۋي تالاپقا ساي 240 ورىندىق اۋەسبەك قامباروۆ اتىنداعى سپورت كەشەنىن پايدالانۋعا بەردى.
اۋدان اكىمدىگىنىڭ ۇسىنىسىن قابىل العان جەكە كاسىپكەر ەسبول اۋەسبەك ۇلى بۇدان بۇرىن قۇرىلىس جۇمىستارىن باستاپ، بولاشاق سپورت كەشەنىنىڭ قازىعىن قاعۋ ءراسىمىن وتكىزگەن بولاتىن. مىنە، اراعا از عانا ۋاقىت سالىپ، جەكە كاسىپكەر دەمەۋشىلىگىمەن سالىنىپ، اۋىلدىڭ اجارىنا ءسان قوسقان كەشەن قۇرىلىسى تولىعىمەن اياقتالىپ، اقتوبەلىكتەردى زور قۋانىشقا كەنەلتتى.
بولاشاقتا وسى كەشەندە شىڭدالعان بالعىن سپورتشىلارىمىز حالىقارالىق دەڭگەيدەگى جارىستاردا توپ جارىپ، وليمپ شىڭىن باعىندىراتىندىعىنا سەنىم ءبىلدىردى اۋىل تۇرعىندارى.
اۋىل تۇرعىندارىنىڭ العىسىنا بولەنگەن جانى جومارت ازاماتقا ەل اعالارى قۇرمەتپەن ەر قاناتى ات مىنگىزىپ، يىعىنا زەرلى شاپان جاپتى. ەندىگى جەردە اۋىل تۇرعىندارى سپورتتىڭ كۇرەس، بوكس، كىشى فۋتبول، ۆوللەيبول، باسكەتبول، ۇستەل تەننيسى سەكىلدى بىرنەشە تۇرىمەن شۇعىلدانىپ، بۇقارالىق سپورتتى دامىتۋعا ءوز ۇلەستەرىن قوساتىن بولادى.
سپورت كەشەنىنىڭ اشىلۋ راسىمىنەن سوڭ تىل ارداگەرى اۋەسبەك قامبارۇلىن ەسكە الۋعا ارنالعان ۆوللەيبولدان وبلىستىق بىرىنشىلىكپەن جالعاسىن تاپتى. تۇرعىندار اراسىندا بۇقارالىق سپورتتى دامىتۋ، سالاۋاتتى ءومىر سالتىن ناسيحاتتاۋ ماقساتىندا ءوتىپ جاتقان تۋرنيرگە وبلىسىمىزدان 10 كوماندا قاتىسىپ، باقتارىن سىنادى.
