باۋىرجان قاراعىز ۇلىنىڭ ايتۋىنشا، بايقاۋدىڭ 16 جۇلدەگەرىنىڭ كىتاپتارىنىڭ ءارقايسىن كەم دەگەندە 2 مىڭ دانامەن كەلەسى جىلى بيۋدجەت قاراجاتى ەسەبىنەن جەكە باسىپ شىعارىپ، قالاماقىسىن تولەۋ جوسپارلانعان.
«رۋح» بايقاۋىندا جەڭىمپاز اتانعان قالامگەرلەرگە جالپى شىعارماشىلىعىندا ءارى قاراي دا قولداۋ كورسەتۋ تۇرعىسىندا، قازىرگى ۋاقىتتا ولاردىڭ ەڭبەكتەرىن مەملەكەتتىك تاپسىرىس ارقىلى شىعارىپ بەرۋ قاراستىرىلىپ جاتىر»، - دەدى ءوزى دە قازاق ادەبيەتىندەگى جاس تولقىننىڭ بەلدى وكىلى سانالاتىن «ادەبيەت پورتالىنىڭ» جەتەكشىسى.
ايتا كەتكەن ءجون، بايقاۋدىڭ باس جۇلدەسىن الۋعا ءبىرقاتار ەلدىڭ اقىن-جازۋشىلارى نيەت ءبىلدىرىپ وتىر. قازاق، ورىس جانە اعىلشىن تىلدەرىندە كەلىپ تۇسكەن جۇمىستاردان بارلىعى 899 تۋىندى ىرىكتەلىپ، جازۋشى، قازاقستان رەسپۋبليكاسى مەملەكەتتىك سىيلىعىنىڭ يەگەرى تولەن ابدىك باسشىلىق ەتەتىن قازىلار القاسى تاراپىنان مۇقيات تارازىلانۋدا ەكەن.
«بايقاۋعا قاتىسۋشىلاردى، ءبىز، تەك ۇسىنىلعان ادەبي تۋىندىلاردىڭ ساپاسىنا قاراپ باعالايمىز. حالىقتىڭ الدىندا مەيلىنشە دۇرىس، ءادىل شەشىم قابىلداۋ جاۋاپكەرشىلىگىن جاقسى تۇسىنەمىز. قاتىسۋشىلارعا ەشقانداي شەكتەۋ قويىلعان جوق، ءبارى اشىق تۇردە جۇرگىزىلدى. مىقتى تۋىندىنى كەز-كەلگەن ادام بالاسى ماماندىعىنا، جاسى مەن جىنىسىنا قاراماستان دۇنيەگە اكەلۋى مۇمكىن، ياعني اتاقتى كلاسسيك زامانداستىرىمىزبەن بىرگە، تالپىنىسى زور جاستارعا دا تەڭ مۇمكىندىك بەرىلدى»، - دەپ ەسكەرتتى قازىلار القاسىنىڭ ءتوراعاسى.
بايقاۋعا جاس اۆتورلاردان تىس، نەسىپبەك ايت ۇلى، قاجىعالي مۇحامبەتقالي ۇلى، نەسىپبەك ءداۋتاي ۇلى، سەرىك اقسۇڭقار ۇلى، راحىمجان وتاربايەۆ، يسرايل ساپارباي، تۇرىسبەك ساۋكەتايەۆ، تىنىمباي نۇرماعامبەتوۆ، يران-عايىپ، ەرماحان شايقى ۇلى، ءمادي قايىڭبايەۆ، مىلتىقباي ەرىمبەتوۆ، شاكەن كۇمىسباي، ەگەۋحان ءمۇقامادي قىزى، باقىت بەدەلحان، دۇكەن ءماسىمحان ۇلى سىندى قازاق ادەبيەتىنىڭ كورنەكتى تۇلعالارى ءوز شىعارمالارىن ۇسىنعان.
ەلدىڭ مادەنيەت سالاسىندا ايشىقتى وقيعا رەتىندە نازار اۋدارتقان بايقاۋ ەلباسى نۇرسۇلتان نازاربايەۆتىڭ «بولاشاققا باعدار: قوعامدىق سانانى جاڭعىرتۋ» باعدارلامالىق ماقالاسىندا بەلگىلەنگەن مىندەتتەردى ىلگەرىلەتۋگە جانە قازاق ادەبيەتىن حالىقارالىق دەڭگەيدە تانىتۋعا ىقپال ەتپەك. وسى ورايدا ءتيىستى شارانى ىسكە اسىرۋدا «جاھانداعى زاماناۋي قازاقستاندىق مادەنيەت» جوباسى بويىنشا قۇرىلعان جۇمىس توبىنىڭ يدەياسى ارقاۋ ەتىلگەن. بۇل تۇستا قازاقستان رەسپۋبليكاسى مادەنيەت جانە سپورت مينيسترلىگى مادەنيەت جانە ونەر ىستەرى دەپارتامەنتى ديرەكتورىنىڭ ورىنباسارى ءابىل جولامانوۆ جاھاندانۋ قاتەرلەرىنە قارسى لايىقتى ۇلتتىق قورعانىس جولدارىن قالىپتاستىرۋدىڭ قاجەتتىلىگىن اتاپ ءوتتى.
وتىنىمدەر اعىمداعى جىلدىڭ 17 قاراشاسى مەن 5 جەلتوقسانى ارالىعى قابىلدانعان I حالىقارالىق «رۋح» ادەبي بايقاۋىنىڭ جەڭىمپازدارىن سالتاناتتى ماراپاتتاۋ ءراسىمى جانە ولاردىڭ قۇرمەتىنە مەرەكەلىك كونسەرت، 12 جەلتوقسانى كۇنى ەۋرازيا ۇلتتىق ۋنيۆەرسيتەتىنىڭ باس عيماراتىندا وتەدى.
ەسكە سالا كەتسەك، بايقاۋدا كەلەسى اتالىمدار تۇزىلگەن:
1) پروزا - رومان، پوۆەست؛
2) پروزا - اڭگىمە، ەسسە؛
3) پوەزيا - پوەما؛
4) پوەزيا - ولەڭدەر توپتاماسى؛
5) ۇزدىك دراماتۋرگيا؛
6) ۇزدىك ادەبي سىن؛
7) پوەزيا - بالالارعا ارنالعان ولەڭدەر؛
8) پروزا - بالالارعا ارنالعان شىعارمالار.
ءار اتالىمنىڭ گران-پري يەگەرى ديپلوممەن ماراپاتتالادى جانە 2 000 000 تەڭگە كولەمىندە اقشالاي سىيلىق الادى.
ءار اتالىمنىڭ 1-ورىن يەگەرى ديپلوممەن ماراپاتتالادى جانە 1 000 000 تەڭگە كولەمىندە اقشالاي سىيلىق يەلەنەدى.
الدابەرگەن كەمپىربايەۆ
