"Rýh" konkýrsyna 899 avtordyń shyǵarmasy qatysyp jatyr
Baýyrjan Qaraǵyzulynyń aitýynsha, baiqaýdyń 16 júldegeriniń kitaptarynyń árqaisyn kem degende 2 myń danamen kelesi jyly biýdjet qarajaty esebinen jeke basyp shyǵaryp, qalamaqysyn tóleý josparlanǵan.
«Rýh» baiqaýynda jeńimpaz atanǵan qalamgerlerge jalpy shyǵarmashylyǵynda ári qarai da qoldaý kórsetý turǵysynda, qazirgi ýaqytta olardyń eńbekterin memlekettik tapsyrys arqyly shyǵaryp berý qarastyrylyp jatyr», - dedi ózi de qazaq ádebietindegi jas tolqynnyń beldi ókili sanalatyn «Ádebiet portalynyń» jetekshisi.
Aita ketken jón, baiqaýdyń bas júldesin alýǵa birqatar eldiń aqyn-jazýshylary niet bildirip otyr. Qazaq, orys jáne aǵylshyn tilderinde kelip túsken jumystardan barlyǵy 899 týyndy iriktelip, jazýshy, Qazaqstan Respýblikasy Memlekettik syilyǵynyń iegeri Tólen Ábdik basshylyq etetin qazylar alqasy tarapynan muqiiat tarazylanýda eken.
«Baiqaýǵa qatysýshylardy, biz, tek usynylǵan ádebi týyndylardyń sapasyna qarap baǵalaimyz. Halyqtyń aldynda meilinshe durys, ádil sheshim qabyldaý jaýapkershiligin jaqsy túsinemiz. Qatysýshylarǵa eshqandai shekteý qoiylǵan joq, bári ashyq túrde júrgizildi. Myqty týyndyny kez-kelgen adam balasy mamandyǵyna, jasy men jynysyna qaramastan dúniege ákelýi múmkin, iaǵni ataqty klassik zamandastyrymyzben birge, talpynysy zor jastarǵa da teń múmkindik berildi», - dep eskertti qazylar alqasynyń tóraǵasy.
Baiqaýǵa jas avtorlardan tys, Nesipbek Aituly, Qajyǵali Muhambetqaliuly, Nesipbek Dáýtaiuly, Serik Aqsuńqaruly, Rahymjan Otarbaev, Israil Saparbai, Turysbek Sáýketaev, Tynymbai Nurmaǵambetov, Iran-Ǵaiyp, Ermahan Shaiqyuly, Mádi Qaiyńbaev, Myltyqbai Erimbetov, Sháken Kúmisbai, Egeýhan Muqamádiqyzy, Baqyt Bedelhan, Dúken Másimhanuly syndy qazaq ádebietiniń kórnekti tulǵalary óz shyǵarmalaryn usynǵan.
Eldiń mádeniet salasynda aishyqty oqiǵa retinde nazar aýdartqan baiqaý Elbasy Nursultan Nazarbaevtyń «Bolashaqqa baǵdar: qoǵamdyq sanany jańǵyrtý» baǵdarlamalyq maqalasynda belgilengen mindetterdi ilgeriletýge jáne qazaq ádebietin halyqaralyq deńgeide tanytýǵa yqpal etpek. Osy oraida tiisti sharany iske asyrýda «Jahandaǵy zamanaýi qazaqstandyq mádeniet» jobasy boiynsha qurylǵan jumys tobynyń ideiasy arqaý etilgen. Bul tusta Qazaqstan Respýblikasy Mádeniet jáne sport ministrligi Mádeniet jáne óner isteri departamenti direktorynyń orynbasary Ábil Jolamanov jahandaný qaterlerine qarsy laiyqty ulttyq qorǵanys joldaryn qalyptastyrýdyń qajettiligin atap ótti.
Ótinimder aǵymdaǵy jyldyń 17 qarashasy men 5 jeltoqsany aralyǵy qabyldanǵan I halyqaralyq «Rýh» ádebi baiqaýynyń jeńimpazdaryn saltanatty marapattaý rásimi jáne olardyń qurmetine merekelik kontsert, 12 jeltoqsany kúni Eýraziia ulttyq ýniversitetiniń bas ǵimaratynda ótedi.
Eske sala ketsek, baiqaýda kelesi atalymdar túzilgen:
1) Proza - roman, povest;
2) Proza - áńgime, esse;
3) Poeziia - poema;
4) Poeziia - óleńder toptamasy;
5) Úzdik dramatýrgiia;
6) Úzdik ádebi syn;
7) Poeziia - balalarǵa arnalǵan óleńder;
8) Proza - balalarǵa arnalǵan shyǵarmalar.
Ár atalymnyń Gran-pri iegeri diplommen marapattalady jáne 2 000 000 teńge kóleminde aqshalai syilyq alady.
Ár atalymnyń 1-oryn iegeri diplommen marapattalady jáne 1 000 000 teńge kóleminde aqshalai syilyq ielenedi.
Aldabergen KEMPIRBAEV
