Aýyl kásipkerligin qoldaýǵa «AMANAT» partiiasynyń «Aýyl amanaty» jobasy airyqsha yqpal etýde, dep habarlaidy dalanews.kz.
Máselen, Batys Qazaqstan oblysy Qaratóbe aýdanynyń Jýsandyoi aýylynda búginde sút baǵytyndaǵy aýyl sharýashylyq kooperativi qarqyndy damyp keledi. Jeńildetilgen qarjylandyrýdyń arqasynda kooperativ músheleri qajetti arnaiy tehnikalardy satyp alyp, ortaq sharýashylyq júrgizý úshin kúsh biriktirgen. Bul qadam óndiris kólemin arttyrýmen qatar, aýyl turǵyndary úshin jańa jumys oryndaryn ashýǵa múmkindik berip otyr.
Kooperativ múshesi Berik Baqytjanovtyń aitýynsha, jobaǵa qatysý otbasylyq kásipti damytýdaǵy mańyzdy qadam bolǵan. Onyń sózinshe, zamanaýi tehnika kúndelikti jumysty jeńildetip, sharýashylyqty tiimdi júrgizýge jol ashqan.
«Bul – atadan balaǵa jalǵasyp kele jatqan kásip. «Aýyl amanaty» jobasynyń arqasynda qajetti tehnikalardy lizingke aldyq. Qazir sol tehnikalardyń kómegimen sharýashylyqty júieli júrgizip, kásibimizdiń aýqymyn keńeitip kelemiz. Aýyl jastary da osyndai múmkindikterdi paidalanyp, óz isin ashsa deimiz. Qys mezgilinde tehnikamen aýyl turǵyndaryna da kómektesemiz», – deidi kásipker.
Kooperativtiń basty artyqshylyqtarynyń biri – birneshe sharýashylyqtyń resýrstaryn biriktirýi. Buryn aýyl turǵyndary jeke jumys istep, kóp shyǵynǵa ushyrasa, búginde tehnikalar ortaq paidalanylyp, shyǵyn kólemi azaiǵan. Mundai tásil sút ónimderiniń kólemin arttyryp qana qoimai, onyń sapasyna da oń áserin tigizýde.
Búginde munda bes adam turaqty jumyspen qamtylǵan. Jaz mezgilinde qosymsha jumysshylar tartý josparlanyp otyr. Aýyl turǵyndarynyń aitýynsha, mundai bastamalar aýyldaǵy kásipkerlikti damytyp, halyqtyń týǵan jerde turaqtap eńbek etýine jaǵdai jasaýda.
Qaratóbe aýdandyq partiia filialynyń atqarýshy hatshysy Abat Zeinýllinniń aitýynsha, «Aýyl amanaty» jobasy búginde aýdannyń aýyl sharýashylyǵyn damytýda mańyzdy ról atqaryp otyr.
– «Qaratóbe aýdanynda «Aýyl amanaty» jobasynyń arqasynda mal sharýashylyǵy belsendi damyp keledi. Shalǵai aýyldardaǵy sharýalar zamanaýi tehnika alyp, kásibin keńeitýge múmkindik alýda. Partiialyq joba aiasyndaǵy qoldaý aýyldaǵy shaǵyn kásipkerlikti damytý úshin asa mańyzdy», – dedi Abat Zeinýllin.
