كازاقستاندىق تەننيسشى ەلەنا رىباكينا ءىرى حالىقارالىق تۋرنيردە جەڭىسكە جەتىپ، WTA ماۋسىمدىق جارىسىنىڭ چەمپيونى اتاندى. الايدا ماراپاتتاۋ ساتىندەگى ءبىر جايت قوعامدا قىزۋ تالقى تۋعىزدى، دەپ حابارلايدى Dalanews.kz.
قوعام قايراتكەرى عالىم بايتۋكتىڭ ايتۋىنشا، ماراپاتتاۋ كەزىندە قازاقستان تۋى كورىنبەگەن.
«تۋ تەك تابلوداعى كىشكەنتاي جازۋ تۇرىندە عانا بولدى. ال سپورتشىنىڭ، ونىڭ كومانداسىنىڭ نەمەسە فەدەراسيا باسشىسى بولات وتەمۇراتوۆتىڭ ۇستىندە ەلدىڭ سيمۆوليكاسى مۇلدە بولعان جوق. ءتىپتى، رىباكينانىڭ سوزىندە دە قازاقستانعا العىس ايتىلعان جوق»، - دەيدى ول.
بايتۋك مۇنى ەل نامىسىن قورعاپ جۇرگەن سپورتشىلار مەن سپورت باسشىلىعى اراسىنداعى ءپاتريوتيزمنىڭ السىزدىگى دەپ باعالادى.
ءماجىلىس دەپۋتاتى مۇرات ابەنوۆ تە بۇل جاعدايعا پىكىر ءبىلدىرىپ، رىباكيناعا مەملەكەتتىك ماراپات بەرۋدىڭ ورىندى-ورىنسىزدىعىن كوتەردى. ونىڭ ايتۋىنشا، ەلدىڭ تۋىن كوتەرمەي، مەملەكەتتىك رامىزدەردى قۇرمەتتەمەگەن سپورتشىنىڭ ماراپاتقا لايىقتىلىعى كۇمان تۋدىرادى.
ەسكە سالا كەتەيىك، بۇعان دەيىن پرەزيدەنت قاسىم-جومارت توقايەۆ ەلەنا رىباكينانى جەڭىسىمەن قۇتتىقتاپ، وعان «بارىس» وردەنىنىڭ III دارەجەسىن بەرۋ تۋرالى جارلىققا قول قويعان بولاتىن.
بۇعان دەيىن دە رىباكيناعا قاتىستى جانكۇيەرلەر اراسىندا ونىڭ ەل اتىنان شىعاتىن جارىستاردان باس تارتاتىنىنا قاتىستى داۋ تۋىنداعان بولاتىن. بىلتىر ول تىنىس جولدارىنىڭ قاتتى قابىنۋىنا بايلانىستى پاريج وليمپياداسىنا قاتىسپايتىنىن حابارلادى.
«ۋيمبلدوننان كەيىن اۋىر برونحيتكە شالدىقتىم. اعزام تولىق قالپىنا كەلگەن جوق، دارىگەرلەر كورتقا شىعۋعا رۇقسات بەرمەدى. قازاقستان ءۇشىن ويناي المايتىنىما قاتتى وكىنەمىن»، — دەدى سپورتشى.
رىباكينانى بۇل وليمپيادادا التىن جۇلدەگە باستى ۇمىتكەرلەردىڭ ءبىرى ساناعان ەدى. الايدا بۇل — ونىڭ ۇلتتىق قۇراما ساپىنداعى العاشقى باس تارتۋى ەمەس. بۇعان دەيىن تەننيسشى 2023 جىلعى ازيا ويىندارىنا، بيللي دجين كينگ كۋبوگىنا، سونداي-اق ىرىكتەۋ جارىستارىنا قاتىسقان جوق.
