Kazaqstandyq tennisshi Elena Rybakina iri halyqaralyq týrnirde jeńiske jetip, WTA maýsymdyq jarysynyń chempiony atandy. Alaida marapattaý sátindegi bir jait qoǵamda qyzý talqy týǵyzdy, dep habarlaidy Dalanews.kz.
Qoǵam qairatkeri Ǵalym Baitýktyń aitýynsha, marapattaý kezinde Qazaqstan týy kórinbegen.
«Tý tek tablodaǵy kishkentai jazý túrinde ǵana boldy. Al sportshynyń, onyń komandasynyń nemese Federatsiia basshysy Bolat Ótemuratovtyń ústinde eldiń simvolikasy múlde bolǵan joq. Tipti, Rybakinanyń sózinde de Qazaqstanǵa alǵys aitylǵan joq», - deidi ol.
Baitýk muny el namysyn qorǵap júrgen sportshylar men sport basshylyǵy arasyndaǵy patriotizmniń álsizdigi dep baǵalady.
Májilis depýtaty Murat Ábenov te bul jaǵdaiǵa pikir bildirip, Rybakinaǵa memlekettik marapat berýdiń oryndy-orynsyzdyǵyn kóterdi. Onyń aitýynsha, eldiń týyn kótermei, memlekettik rámizderdi qurmettemegen sportshynyń marapatqa laiyqtylyǵy kúmán týdyrady.
Eske sala keteiik, buǵan deiin prezident Qasym-Jomart Toqaev Elena Rybakinany jeńisimen quttyqtap, oǵan «Barys» ordeniniń III dárejesin berý týraly jarlyqqa qol qoiǵan bolatyn.
Buǵan deiin de Rybakinaǵa qatysty jankúierler arasynda onyń el atynan shyǵatyn jarystardan bas tartatynyna qatysty daý týyndaǵan bolatyn. Byltyr ol tynys joldarynyń qatty qabynýyna bailanysty Parij olimpiadasyna qatyspaitynyn habarlady.
«Ýimbldonnan keiin aýyr bronhitke shaldyqtym. Aǵzam tolyq qalpyna kelgen joq, dárigerler kortqa shyǵýǵa ruqsat bermedi. Qazaqstan úshin oinai almaitynyma qatty ókinemin», — dedi sportshy.
Rybakinany bul olimpiadada altyn júldege basty úmitkerlerdiń biri sanaǵan edi. Alaida bul — onyń ulttyq qurama sapyndaǵy alǵashqy bas tartýy emes. Buǵan deiin tennisshi 2023 jylǵy Aziia oiyndaryna, Billi Djin King kýbogyna, sondai-aq irikteý jarystaryna qatysqan joq.
