كەڭەستىڭ پىكىرىنشە، 5 ماۋسىمدا رەسپۋبليكالىق رەفەرەندۋمدا قابىلدانعان «قازاقستان رەسپۋبليكاسىنىڭ كونستيتۋسياسىنا وزگەرىستەر مەن تولىقتىرۋلار ەنگىزۋ تۋرالى» زاڭ قوعام مەن مەملەكەتتى ودان ءارى جاڭعىرتۋدىڭ قۇقىقتىق نەگىزدەرىن قالادى. كونستيتۋسياعا تۇزەتۋلەر مەن ولاردىڭ نەگىزىندە قابىلداناتىن زاڭنامالىق اكتىلەر جاڭا قازاقستاننىڭ دامۋىنا ىقپال ەتەدى.
جولداۋدا كونستيتۋسيالىق كەڭەستىڭ 26 جىل ىشىندەگى قىزمەتى قورىتىندىلاندى.
ق. ءمامي اتاپ وتكەندەي، وسى جىلدارى كونستيتۋسيالىق كەڭەس 140-تان استام نورماتيۆتىك قاۋلى قابىلدادى. قوعامدا رەزونانس تۋدىرعان وتىزداي زاڭ كونستيتۋسيالىق ەمەس دەپ تانىلىپ، كەرىسىنشە، ءبىرقاتار زاڭداردىڭ كونستيتۋسياعا سايكەستىگى راستالدى.
سونىمەن قاتار كەڭەس اتا زاڭنىڭ نورمالارىن رەسمي ءتۇسىندىرۋ تۋرالى 100-دەن استام ءوتىنىشتى قارادى.
پارلامەنتكە ەلىمىزدەگى كونستيتۋسيالىق زاڭدىلىقتىڭ جاي-كۇيى تۋرالى 27 جولداۋ ۇسىنىلدى. ولاردا ەلىمىزدەگى كونستيتۋسيالىق باقىلاۋدى جۇزەگە اسىرۋ تاجىريبەسى اشىلىپ، زاڭ شىعارۋ پروسەسىن جەتىلدىرۋ، زاڭنامانى كونستيتۋسياعا سايكەس كەلتىرۋ تۋرالى جانە ت. ب. ماسەلەلەر كوتەرىلدى.
كونستيتۋسيالىق كەڭەستىڭ ءتوراعاسى كەڭەستىڭ قۇقىقتىق ۇستانىمدارىنىڭ زاڭدىق كۇشى الداعى ۋاقىتتا دا ساقتالا بەرەتىنىنە توقتالدى. بۇل ۇستانىمدار ەلىمىزدىڭ كونستيتۋسيالىق قۇرىلىسىنىڭ نەگىزدەرى، مەملەكەتتىڭ اۋماقتىق تۇتاستىعى، ازاماتتىق ينستيتۋتى، مەملەكەتتىك رامىزدەردى پايدالانۋ ماسەلەلەرىنە بايلانىستى جاسالعان. كەڭەستىڭ ءبىرقاتار شەشىمدەرى قولدانىستاعى زاڭنامانىڭ قۇرىلىمىنا، ۇلتتىق جانە حالىقارالىق قۇقىقتىڭ ءوزارا ارەكەتتەسۋىنە، نارىقتىق ەكونوميكا قاعيداتتارى مەن مەنشىك نىساندارىنا، وتباسى ينستيتۋتىنا، قۇقىق قورعاۋ جۇيەسىنە، سايلاۋ پروسەسىنە جانە ادامنىڭ كونستيتۋسيالىق قۇقىقتارى مەن بوستاندىقتارىن ىسكە اسىرۋ تەتىكتەرىنە قاتىستى بولعان.
جولداۋدىڭ جەكە تاراۋى كەڭەستىڭ كونستيتۋسيوناليزمدى دايەكتى تۇردە بەكىتۋدەگى جانە ازاماتتاردىڭ قۇقىقتىق مادەنيەتىن ارتتىرۋداعى بەلسەندى رولىنە ارنالدى.
كونستيتۋسيالىق كەڭەس نەگىزگى زاڭنىڭ ەرەجەلەرىن عىلىمي-پۋبليسيستيكالىق ءتۇسىندىرۋدى جۇيەلى تۇردە جۇزەگە اسىرىپ كەلەدى. وسى ماقساتتا كونستيتۋسياعا قۇقىقتىق تۇسىنىكتەمەلەر بەرىپ، كونستيتۋسيالىق قۇرىلىس بويىنشا ءبىرقاتار كىتاپتار شىعارىلدى.
2018 جىلدان باستاپ كونستيتۋسيالىق كەڭەستىڭ جانىندا عىلىمي-كونسۋلتاتيۆتىك كەڭەس جۇمىس ىستەيدى. ونىڭ وتىرىستارىندا قۇقىق ەۆوليۋسياسىنىڭ كوپتەگەن وزەكتى اسپەكتىلەرى قارالدى.
وسى جىلدار ىشىندە كوپۆەكتورلى سىرتقى ساياسات اياسىندا كونستيتۋسيالىق كەڭەستىڭ حالىقارالىق بايلانىستارى دا دامىدى. ول بۇۇ، ەقىۇ، ەۋروپالىق وداق قۇرىلىمدارىمەن، ەۋروپا كەڭەسىنىڭ ۆەنەسيالىق كوميسسياسىمەن تىعىز ىنتىماقتاستىقتا جۇمىس ىستەپ كەلەدى. كەڭەس كونستيتۋسيالىق سوت تورەلىگى جونىندەگى دۇنيەجۇزىلىك كونفەرەنسيانىڭ، كونستيتۋسيالىق باقىلاۋ ورگاندارىنىڭ ەۋرازيالىق قاۋىمداستىعىنىڭ (ءتوراعالىق ەتەدى) جانە ازيالىق كونستيتۋسيالىق سوتتار مەن وعان تەڭەستىرىلگەن ينستيتۋتتار قاۋىمداستىعىنىڭ (2019-2021 جىلدارى ءتوراعالىق ەتتى) مۇشەسى بولىپ تابىلادى.
ەكىجاقتى قاتىناستار سالاسىندا 50-دەن استام ەلدىڭ كونستيتۋسيالىق باقىلاۋ ورگاندارىمەن تىعىز بايلانىستار ورناتىلعان.
تۇتاستاي العاندا، كونستيتۋسيالىق كەڭەستىڭ حالىقارالىق قىزمەتى قۇقىقتىق مەملەكەت قاعيداتتارىن بەكىتۋ جانە قازاقستاننىڭ قولايلى ءيميدجىن قالىپتاستىرۋ پروسەسىندە ماڭىزدى ءرول اتقارىپ وتىر.
كونستيتۋسيا – ازاتتىعىمىزدىڭ ايشىقتى ايعاعى، ەگەمەندى قازاقستاننىڭ بەرىك تۇعىرى. رەسپۋبليكانىڭ جاڭارتىلعان كونستيتۋسياسى زامان تالاپتارىنا ساي كەلەدى، دەپ قورىتىندىلادى ءسوزىن كونستيتۋسيالىق كەڭەستىڭ ءتوراعاسى.
