ساراپشىلار قازاقستان رەسەي ٷشٸن نەگە ماڭىزدى ەكەنٸن تٷسٸندٸرٸپ بەردٸ. بٷگٸندە قازاقستان كٶرشٸلەس ەلدە سوعىس پەن سانكتسييا جٷرٸپ جاتقان كەزدە تەپە-تەڭدٸكتٸ ساقتاۋعا تىرىسىپ وتىر.
وسى تۇستا قازاقستاندىق ساياساتتانۋشى دوسىم سەتباەۆ قازاقستاننىڭ كرەمل ٷشٸن ماڭىزىن بٸرنەشە فاكتورمەن تٷسٸندٸرٸپ بەردٸ. ول بۇل تۋرالى ۆلاديمير كراۆچەنكونىڭ ماتەريالىندا ايتتى, - دەپ حابارلايدى Dalanews.kz.
ساراپشىنىڭ پٸكٸرٸنشە, بٸرٸنشٸدەن, مەسكەۋ قىتايمەن بەلسەندٸ قارىم-قاتىناس جاساعىسى كەلسە, وندا ورتا ازيياداعى پوزيتسيياسىن ودان ەرٸ نىعايتۋى كەرەك ەكەنٸن تٷسٸنەدٸ. ەكٸنشٸدەن, رەسەي سانكتسييالاردى اينالىپ ٶتۋ ساياساتىنىڭ بٸر بٶلٸگٸنە اينالدىرۋ ٷشٸن قازاقستان ەكونوميكاسىندا ىقپالىن كٷشەيتۋگە نيەتتٸ.
"رەسەيدٸڭ قازاقستانعا بەلسەندٸ ەكونوميكالىق ەكسپانسيياسى جٷرٸپ جاتىر, بۇل بٸز ٷشٸن ەلەۋلٸ گەوساياسي قاۋٸپ تۋعىزادى. رەسەيلٸك كومپانييالار ەلدەگٸ پوزيتسيياسىن بەلسەندٸ تٷردە نىعايتىپ جاتقانىن كٶرٸپ وتىرمىز, بۇل ٶتە-مٶتە قاۋٸپتٸ ٷردٸس. ولاردىڭ ٸشٸندە "گازپروم", "لۋكويل", "روساتوم" سەكٸلدٸ الپاۋىتتار بار. 2019 جىلى قازاقستاندا 7 مىڭعا جۋىق رەسەيلٸك كومپانييا بولسا, قازٸر ولاردىڭ سانى 20 مىڭعا جۋىقتاپ قالدى. كەيبٸر قازاقستاندىق وليگارحتار سوڭعى ۋاقىتتا ٶز اكتيۆتەرٸن رەسەيلٸك بيزنەسكە جاپپاي ساتا باستادى", - دەدٸ ول.
تاعى بٸر ساراپشى سەرگەي كونوۆالوۆ رەسەي فەدەراتسيياسى ٷشٸن قازاقستاننىڭ ادال بولىپ قالۋى ماڭىزدى ەكەنٸن مەلٸمدەدٸ. بٸراق استانانىڭ مەسكەۋدەن بەلگٸلٸ بٸر قاشىقتا بولۋى رەسەيلٸكتەر ٷشٸن ارتىقشىلىقتارعا يە ەكەن.
سونىمەن قاتار, ول قازاقستان سوعىس پەن سانكتسييا, بٸر جاعىنان ينتەگراتسييالىق بٸرلەستٸكتەر اياسىنداعى تىعىز ٶزارا ٸس-قيمىل جاسايتىن ٶتە كٷردەلٸ ديپلوماتييالىق پارتييانى ويناپ وتىرعانىن جەتكٸزدٸ.
ايتا كەتەيٸك, بۇعان دەيٸن قازاقستان قارىزعا بەلشەدەن باتىپ جاتقانى, سوڭعى بەس جىلدا ەلدٸڭ سىرتقى بەرەشەگٸ 4 ميلليارد دوللارعا ارتقانى تۋرالى اقپاراتتار تارادى. ۇلتتىق بانكتٸڭ دەرەگٸنشە 2024 جىلى ەلدٸڭ سىرتقى قارىزى 163 ميلليارد دوللار بولعان, بۇل وسىدان بەس جىل بۇرىنعى كٶرسەتكٸشپەن سالىستىرعاندا بٸرنەشە ميللياردقا كٶپ. سونىڭ ٸشٸندە رەسەيگە بەرەشەگٸ كٶپ بولىپ شىقتى.
قازاقستانعا ەڭ كٶپ نەسيە بەرگەن ەل – نيدەرلاند: 42,6 ميلليارد دوللار. دەگەنمەن قازاقستاننىڭ رەسەيگە الدىنداعى بەرەشەگٸ ەرەكشە كٶزگە تٷسەدٸ. سوڭعى بەس جىلدا قازاقستاننىڭ تەرٸسكەي كٶرشٸسٸنە قارىزى 47,1 پايىزعا ارتىپ, 13 ميلليارد دوللارعا جەتكەن. بۇل مەسكەۋدٸڭ قازاقستان ەكونوميكاسىنداعى قارجىلىق ىقپالى مەن بەلسەندٸلٸگٸن ايتارلىقتاي كٷشەيتٸپ وتىر.
ال باتىس ەلدەرٸنٸڭ تاراپىنان نەسيە بەرۋشٸلەرٸنٸڭ قارىزدارى ازايا باستاعان. ۇلىبريتانييا مەن اقش قازاقستانعا قارىز بەرۋدٸ ايتارلىقتاي ازايتقان.
