"قۇجاتتاردا 18 توننا دەپ كورسەتىلگەنىمەن، ءىس جۇزىندە 40 توننا تاسىمالدانعان. ونىڭ اقىسى، نەگىزىنەن قولما-قول اقشامەن تولەنەدى. سىبىردە باعا ارزانداپ كەتكەن، سوندىقتان ەليەۆاتورلار استىققا تولىپ، تاۋار كىم كورىنگەننىڭ قولىنا ارزانعا كەتىپ جاتىر. ولارداعى ەليەۆاتور ماسەلەسى بىزدىكىنەن دە وتكىر. ماۋسىم ايىنىڭ باسىندا-اق ولاردىڭ قامباسىنىڭ تەڭ جارتىسى تولىپ، ماسەلە وزەكتىلىك تانىتقان"، - دەيدى استىق وداعىنىڭ وكىلى ەۆگەنيي كارابانوۆ.
 

• سۇرانىس جوق،
• ەليەۆاتورلار تولىپ كەتكەن،
• تاسىمال سۋبسيديالانبايدى. 

"ديقاندارعا بيدايدى سىبىردەن ەلدىڭ باسقا قيىرىنا جەتكىزۋ قىمباتقا تۇسەدى. ونىڭ ۇستىنە ورتالىقتا جاقسى ءونىم جينالادى، ال ءتورتىنشى سورتتى بيدايدىڭ ولارعا قاجەتى جوق. باعا سودان تومەندەپ جاتىر. سوندىقتان ونى قازاقستانعا اكەلىپ جاتىر"، - دەيدى ساراپشى.
 

رەسەيلىك استىقتىڭ قازاقستانعا كونتراباندالىق جولمەن تاسىمالداۋ تامىز ايىندا باستالىپ، ءقازىر قارقىن الىپ تۇر، ونى توقتاتۋ دا مۇمكىن بولماۋدا.

"شەكارا وتكەلدەرى سالماق ولشەۋ جۇيەسىمەن جابدىقتالعانشا جۇك كولىكتەرى تاسىمالىنا تىيىم سالۋ كەرەك. بارلىق شەكارا وتكەلدەرىن بۇل قۇرىلعىمەن جابدىقتاۋدىڭ قاجەتى جوق، ءار وبلىستا ەكى-ۇشەۋىن ورناتۋعا بولادى جانە مىندەتتى تۇردە استىق تاسىمالى تەك سول بەكەتتەر ارقىلى جۇزەگە اسىرىلسا. ايتپەسە،كونتراباندا ىشكى باعاعا اۋىر "سوققى" بولىپ تيۋدە"، - دەيدى كارابانوۆ.

 
ال KazGrain ۇلتتىق ەكسپورتتاۋشىلار قاۋىمداستىعى يمپورتقا تىيىم سالۋ ماسەلەنى شەشپەيدى دەپ سانايدى. ونىڭ پىكىرىنشە، الدىمەن شەكارادا ءتارتىپتى قالپىنا كەلتىرۋ كەرەك.

"بىرىنشىدەن، قازاقستان تاراپى 6-7 جىلدان بەرى يمپورتتى باقىلايتىن تارازىلار ورناتا الماي كەلەدى. ەكىنشىدەن، رەسەيلىك استىق قازاق استىعى رەتىندە تىركەلمەۋى ءۇشىن جالپى ءونىم كولەمىن رەتتەۋ كەرەك. سانداردى بۇرمالاۋعا جول بەرمەۋ قاجەت. كوپتەگەن شارۋالار رەسەيلىك استىقتى ءوز استىعى رەتىندە وتكىزىپ، قوسىمشا كولەمدەرگە قۇجات بەرەدى. ۇشىنشىدەن، جەرگىلىكتى بيلىك وكىلدەرى بۇل جاعدايدان حاباردار بولسا دا وعان كوز جۇما قاراپ، ءتىپتى كاماز كولىكتەرىن وتكىزۋگە رۇقسات بەرەدى. بۇل كونترابانداعا قارسى كەشەندى كوزقاراستى تالاپ ەتەدى. ءبىز يمپورتتىڭ بارلىعىن ءبىر عانا "ازىق-تۇلىك كورپوراسياسىنا" بەرىپ قويماۋىمىز كەرەك"، - دەيدى قاۋىمداستىق باسشىسى زەينوللا ءابدۋماناپوۆ. 

تىيىم سالۋعا كەلەتىن بولساق، قاۋىمداستىق باسشىسىنىڭ ايتۋىنشا، ول جىلدار بويى قولدانىسىمىزدا بار دۇنيە. 

"ەگەر ماسەلە كاسىبي تۇردە شەشىلمەسە، ءبىز ماڭگىلىك وسى تىيىممەن ءومىر سۇرە بەرەمىز. تىيىم سالۋ - بۇل شەشىم ەمەس. ولار بۇگىن توقتايدى، سودان كەيىن ەرتەڭ قايتادان جاندانادى"، - دەگەن ول كونتراباندامەن قاتاڭ باقىلاۋ، ەسەپكە الۋدى سيفرلاندىرۋ جانە ساۋدانىڭ اشىقتىعى سەكىلدى جۇيەلى ءارى كەشەندى شارالار ارقىلى كۇرەسۋ كەرەكتىگىن قاداپ ايتادى.