ماسكەۋدەگى ويىن-ساۋىق نىساندارىنىڭ بىرىندە ءىرى كولەمدە تەراكت بولىپ، جۇزدەن اسا ادام قازا تاپتى. وسى وقيعادان كەيىن ماسكەۋ قالاسىنىڭ جالپى يۋريسديكسيا سوتتارى كۇدىكتىلەرگە قانداي بۇلتارتپاۋ شاراسى تاڭدالعانىن جاريالادى، - دەپ حابارلايدى Dalanews.kz.
ماسكەۋ قالاسىنىڭ اۋداندىق سوتىنا كروكۋس-ەكسپو ساۋدا ويىن-ساۋىق ورتالىعىندا اۋقىمدى تەرروريستىك اكت جاسادى دەگەن كۇدىكتىلەر اكەلىنگەن. كەيىنىرەك باسمان اۋداندىق سوتى تەرروريستەر توبىنا قاتىستى الدىن الا تەرگەۋ ورگاندارىنىڭ بۇلتارتپاۋ شاراسىن تاڭداۋ تۋرالى ءوتىنىشىن قاراۋعا كىرىستى.
رەسەيدىڭ توتەنشە جاعدايلار مينيسترلىگىنىڭ الدىن الا اقپاراتى بويىنشا تەرروريستەردىڭ اتىس قارۋىن قولدانۋى مەن ساۋدا ويىن-ساۋىق ورتالىعى ورتەنۋىنەن 130-دان اسا ادام قازا تاپقان، زارداپ شەككەندەردىڭ سانى 180 ادامنان اسادى.
كۇدىكتىلەر كىناسىن مويىنداعان. سونداي-اق، ءتورت كۇدىكتى دە ازىرگە قاماۋدا وتىراتىنى بەلگىلى بولدى.
ماسكەۋ قالاسىنىڭ باسمان اۋداندىق سوتى تاجىكستاننىڭ تۋماسى دالەردجون ميرزويەۆقا قاتىستى بۇلتارتپاۋ شاراسىن تاڭدادى. ول رەسەي فەدەراسياسىنىڭ قىلمىستىق كودەكسىنىڭ 205-بابىنىڭ 3-بولىگىنىڭ "ب" تارماعىندا (تەرروريستىك اكت) كوزدەلگەن قىلمىستى جاسادى دەپ ايىپتالىپ وتىر.
"ميرزويەۆ قارۋلى ۇيىمداسقان توپ قۇرامىندا "كروكۋس سيتي حولل" عيماراتىندا بولعان رەسەي فەدەراسياسىنىڭ ازاماتتارىن اتۋعا قاتىستى. سودان كەيىن ايىپتالۋشىلار "كروكۋس سيتي حولل" عيماراتىن ورتەپ جىبەردى.
ميرزايەۆ كىنانى تولىق مويىندادى. ماسكەۋ قالاسىنىڭ باسمان اۋداندىق سوتى تەرگەۋ ورگاندارىنىڭ ءوتىنىشىن قاناعاتتاندىردى جانە ميرزويەۆكە قاتىستى 1 اي 28 تاۋلىككە قاماۋدا ۇستاۋ تۇرىندەگى بۇلتارتپاۋ شاراسىن تاڭدادى، ياعني 2024 جىلعى 22 مامىرعا دەيىن"، - دەپ جازىلعان مالىمەتتە.
كەيىنىرەك سوت كروكۋس سيتي حوللعا قاتىستى ەكىنشى ايىپتالۋشىعا بۇلتارتپاۋ شاراسىن تاڭدادى.
"ماسكەۋ قالاسىنىڭ باسمان اۋداندىق سوتى رەسەي فەدەراسياسىنىڭ قىلمىستىق كودەكسىنىڭ 205-بابىنىڭ 3-بولىگى "ب" تارماعىندا كوزدەلگەن (تەرروريستىك اكت) قىلمىستى جاسادى دەپ ايىپتالعان سايداكرامي راچاباليزوداعا قاتىستى بۇلتارتپاۋ شاراسىن تاڭدادى.
راچاباليزودا كىنانى مويىندادى. سوت 1 اي 28 تاۋلىك مەرزىمگە قاماۋعا الۋ تۇرىندەگى بۇلتارتپاۋ شاراسىن تاڭدادى، ياعني 2024 جىلعى 22 مامىرعا دەيىن"، - دەپ جازىلعان سوت مالىمەتىندە.
سونىمەن قاتار، "كروكۋس سيتي حوللداعى" تەرروريستىك اكت بويىنشا ءۇشىنشى قاتىسۋشى دا قاماۋعا الىندى.
"باسمان اۋداندىق سوتى رەسەي فەدەراسياسىنىڭ قىلمىستىق كودەكسىنىڭ 205-بابىنىڭ 3-بولىگى "ب" تارماعىندا (تەرروريستىك اكت) كوزدەلگەن قىلمىستى جاسادى دەپ ايىپتالعان شامسيدين فاريدۋنيگە قاتىستى بۇلتارتپاۋ شاراسىن تاڭدادى.
سوت 1 اي 28 تاۋلىك مەرزىمگە، ياعني 2024 جىلعى 22 مامىرعا دەيىن قاماۋعا الۋ تۇرىندەگى بۇلتارتپاۋ شاراسىن تاڭدادى"، - دەپ جازىلعان مالىمەتتە.
كەيىنىرەك ءتورتىنشى ايىپتالۋشىعا دا بۇلتارتپاۋ شاراسى تاڭدالدى. مۇحاممەدسوبير فايزوۆ رەسەي فەدەراسياسىنىڭ قىلمىستىق كودەكسىنىڭ 205-بابىنىڭ 3-بولىگى "ب" تارماعىندا (تەرروريستىك اكت) كوزدەلگەن قىلمىستى جاسادى دەپ ايىپتالىپ وتىر.
سوت وعان دا 2024 جىلعى 22 مامىرعا دەيىن قاماۋعا الۋ تۇرىندەگى بۇلتارتپاۋ شاراسىن تاڭدادى.
ايتا كەتەيىك، 22 ناۋرىزدا بەلگىسىز بىرەۋلەر ماسكەۋدەگى كروكۋس سيتي حولل كونسەرت زالىندا ادامدارعا وق جاۋدىردى.
كەيىن كونسەرت زالىندا ءورت شىققان. سەبەبى وق اتقاندار گراناتا جارعان.
"زالدا جۇرگەن ادامدار اتىستان قورعانۋ ءۇشىن بىردەن جەرگە جاتىپ قورعاندى. كەمىندە 15-20 مينۋت جەردە جاتىپ، اقىرىنداپ سىرتقا شىعا باستادى. كوبى قاشىپ ۇلگەردى"، - دەپ جازدى سول كەزدە رەسەيلىك ارنالار.
دەرەكتەرگە سۇيەنسەك، اتىس "پيكنيك" روك-توبىنىڭ كونسەرتىنە بىرنەشە مينۋت قالعاندا باستالعان.
