قازاقستان ءۇش بىردەي جىلۋ-ەلەكتر ورتالىعىن رەسەيلىك ارىپتەستەردىڭ كومەگىنسىز ءوزى سالاتىن بولدى. بۇل تۋرالى ۇكىمەت ۇيىندە وتكەن بريفينگتە پرەمەر-مينيستردىڭ ورىنباسارى رومان سكليار مالىمدەدى، دەپ حابارلايدى Dalanews.kz.
سكلياردىڭ ايتۋىنشا، باستاپقىدا كوكشەتاۋ، سەمەي جانە وسكەمەن قالالارىنداعى ءۇش جەو-نى رەسەيدىڭ «ينتەر راو» كومپانياسى تۇرعىزۋى ءتيىس بولعان. ول ءۇشىن كومپانيا قازاقستاننان جەڭىلدەتىلگەن شارتپەن قارجى الۋدى كوزدەگەن.
«العاشقى جوسپار بويىنشا، «ينتەر راو» بۇل جوبالاردى ەكسپورتتىق قارجىلاندىرۋ ەسەبىنەن جۇزەگە اسىرماق بولعان. الايدا، كومپانيا قاجەتتى قارجى كوزدەرىن تارتا المادى. سوندىقتان قازاقستان بۇل جوبالاردى ءوز قاراجاتى ەسەبىنەن جۇزەگە اسىرۋعا شەشىم قابىلدادى»، – دەدى سكليار.
ءقازىر كوكشەتاۋداعى جەو قۇرىلىسىنىڭ العاشقى كەزەڭى باستالىپ كەتكەن. جوبانىڭ باس مەردىگەرى – «سامۇرىق-ەنەرگو» ۇلتتىق كومپانياسى. سەمەي جانە وسكەمەن قالالارىنداعى جەو-لاردى سالۋ جۇمىستارى دا ءدال وسىنداي تارتىپپەن جۇرمەك.
«ەگەر الداعى ۋاقىتتا رەسەيلىك سەرىكتەستەر تاراپىنان قارجى تارتۋ تۋرالى ۇسىنىستار تۇسسە، «سامۇرىق-ەنەرگو» ولاردى قاراستىرۋعا ءازىر. بۇعان ەش كەدەرگى جوق. مۇنداعى باستى ماقسات – تاريفتەردى قولجەتىمدى دەڭگەيدە ۇستاپ تۇرۋ»، – دەپ تولىقتىردى ۆيسە-پرەمەر.
ازىرگە ءار جەو-نىڭ ناقتى قۇنى جاريالانعان جوق. ءبىراق رومان سكلياردىڭ ايتۋىنشا، ءبىر گيگاۆاتت قۋاتقا جۇمسالاتىن قاراجات شامامەن 2-2،5 ميلليون دوللاردى قۇراۋى مۇمكىن.
ايتا كەتەيىك، 2023 جىلدىڭ قاراشاسىندا قازاقستان-رەسەي اراسىنداعى ءحىح ءوڭىرارالىق ىنتىماقتاستىق فورۋمىندا ۆيسە-پرەمەر سەرىك جۇمانعارين ءۇش بىردەي جەو-نى رەسەيمەن بىرلەسىپ سالۋ جوسپارى تۋرالى حابارلاعان ەدى. الايدا، قازىرگى جاعدايدا بۇل جوبالاردى قازاقستان ءوزى جۇزەگە اسىراتىن بولدى.
