Qazaqstan úsh birdei jylý-elektr ortalyǵyn reseilik áriptesterdiń kómeginsiz ózi salatyn boldy. Bul týraly Úkimet úiinde ótken brifingte Premer-ministrdiń orynbasary Roman Skliar málimdedi, dep habarlaidy Dalanews.kz.
Skliardyń aitýynsha, bastapqyda Kókshetaý, Semei jáne Óskemen qalalaryndaǵy úsh JEO-ny Reseidiń «Inter RAO» kompaniiasy turǵyzýy tiis bolǵan. Ol úshin kompaniia Qazaqstannan jeńildetilgen shartpen qarjy alýdy kózdegen.
«Alǵashqy jospar boiynsha, «Inter RAO» bul jobalardy eksporttyq qarjylandyrý esebinen júzege asyrmaq bolǵan. Alaida, kompaniia qajetti qarjy kózderin tarta almady. Sondyqtan Qazaqstan bul jobalardy óz qarajaty esebinen júzege asyrýǵa sheshim qabyldady», – dedi Skliar.
Qazir Kókshetaýdaǵy JEO qurylysynyń alǵashqy kezeńi bastalyp ketken. Jobanyń bas merdigeri – «Samuryq-Energo» ulttyq kompaniiasy. Semei jáne Óskemen qalalaryndaǵy JEO-lardy salý jumystary da dál osyndai tártippen júrmek.
«Eger aldaǵy ýaqytta reseilik seriktester tarapynan qarjy tartý týraly usynystar tússe, «Samuryq-Energo» olardy qarastyrýǵa ázir. Buǵan esh kedergi joq. Mundaǵy basty maqsat – tarifterdi qoljetimdi deńgeide ustap turý», – dep tolyqtyrdy vitse-premer.
Ázirge ár JEO-nyń naqty quny jariialanǵan joq. Biraq Roman Skliardyń aitýynsha, bir gigavatt qýatqa jumsalatyn qarajat shamamen 2-2,5 million dollardy quraýy múmkin.
Aita keteiik, 2023 jyldyń qarashasynda Qazaqstan-Resei arasyndaǵy HIH Óńiraralyq yntymaqtastyq forýmynda vitse-premer Serik Jumanǵarin úsh birdei JEO-ny Reseimen birlesip salý jospary týraly habarlaǵan edi. Alaida, qazirgi jaǵdaida bul jobalardy Qazaqstan ózi júzege asyratyn boldy.
