رايىمبەك اۋدانىندا وبلىس اكىمى اماندىق باتالوۆتىڭ تىكەلەي قولداۋىمەن گوللانديادان اكەلىنگەن كارتوپتىڭ «سانتا»، «اگريا» اتتى تۇقىمدارى وسىرىلۋدە. بۇعان دەيىن رايىمبەك پەن كەگەن اۋداندارى وزدەرىنىڭ كارتوپتارىمەن اتى شىققان بەلگىلى. بۇگىندە اۋدانداعى بايىرعى ءداستۇرلى شارۋاشىلىقتى جانداندىرۋعا قايتا كوڭىل ءبولىنىپ، كوپتەگەن جۇمىستار اتقارىلۋدا.

وتكەن جىلى اتالعان تۇقىم وسىرىلگەن كارتوپ القابىنىڭ ءار گەكتارىنان 200-300 سەنتنەردەن ساپالى ءونىم الىندى. وسىلايشا جەر ەمگەن شارۋالار كاراتوپ وسىرۋگە باسا كوڭىل بولە باستادى.

رايىمبەك اۋدانى اكىمى نۇرجان قۇدايبەرگەنوۆ باستاعان اۋدانداعى فەرمەرلەرى، كووپەراتيۆ باسشىلارى، قوجالىق ءتوراعالارى بەرەرى مول كارتوپ تۇقىمى وسىرىلگەن القاپتىڭ كولەمىن ارتىرىپ كەلەدى. بيىل اۋدان بويىنشا 6050 گەكتار جەرگە كارتوپ ەگىلسە، سونىڭ ىشىندە 3000 گەكتارى سۋپەر-ەليتالىق «سانتا»، «اگريا» تۇقىمدارى وتىرعىزىلعان.

اۋداندا 3 سەرۆيستىك-دايىنداۋ ورتالىقتارى، كارتوپ ءوسىرۋ باعىتىنداعى بىرنەشە وندىرىستىك كووپەراتيۆتەر جۇمىس ىستەيدى. الماتى وبلىس اكىمىنىڭ قولداۋىمەن سەرۆيستىك ورتالىقتار 21 جاڭا تراكتورعا، 72 اگرەگاتقا يە بولدى.

كارتوپ وسىرۋدە جەرى سۋلى، نۋلى قاقپاق اۋىلدىق وكرۋگىنىڭ ۇلەسى جوعارى. اۋىل اكىمى جۇماش الىمعوجايەۆ باستاعان ءوڭىر ەڭبەككەرلەرى بيىل 750 گەكتار جەرگە كارتوپ وتىرعىزعانىن ايتتى. وكرۋگتەگى عاني سىدىقاقىنوۆ، نۇرلان قۇدياربەكوۆ، نۇربول انارقۇلوۆ باسقاراتىن شارۋا قوجالىقتارى، باقىت قۋان باسقاراتىن «ءۇش قاقپاق» وندىرىستىك كووپەراتيۆى كارتوپتىڭ كولەمىن ارتتىرىپ، سورتتى تۇقىممەن جۇمىس جاساۋدا. وسىلايشا رايىمبەك اۋدانىنىڭ شارۋالارى كارتوپتىڭ ساپالى تۇۇىمىن ءوسىرىپ، مول ءونىم الۋعا بەلدى بەكەم بۋىپ وتىر.