سپورتتىق برەندتى، ينفراقۇرىلىمدى جانە كلۋبتىڭ اكتيۆتەرىن بەرۋ تۋرالى كەلىسىمگە قول قويىلدى دەپ حابارلايدى Dalanews.kz.
پەتروپاۆل قالاسىندا سپورتتىق ساباقتاستىق تۋرالى كەلىسىمگە قول قويىلدى. قۇجات «قىزىل-جار» فۋتبول كومانداسىنىڭ قفف، FIFA جانە UEFA قولداۋىمەن وتەتىن جارىستارعا قاتىسۋىنا بايلانىستى قۇقىقتارى مەن مىندەتتەرىنىڭ بەرىلۋىن انىقتايدى.
مەملەكەت باسشىسىنىڭ كاسىبي فۋتبول كلۋبتارىن جەكەشەلەندىرۋ جونىندەگى تاپسىرماسىن ىسكە اسىرۋ شەڭبەرىندە «قىزىل-جار» فۋتبول كلۋبىنىڭ ينۆەستورى بولىپ كاسىپكەر سەرگەي كان انىقتالدى.
باسقارۋدى ءتيىمدى دامىتۋ جانە جاڭعىرتۋ ماقساتىندا ينۆەستور جاڭا زاڭدى تۇلعانى – «QYZYLJAR» فۋتبول كلۋبى» جەكە مەكەمەسىن تىركەدى.
تاراپتار بارلىق جارىستارعا قاتىسۋ قۇقىعىن بەرۋمەن قاتار، كوماندا جارىستارعا قاتىساتىن كلۋب اتاۋىن بەرۋ تۋرالى ۋاعدالاستىقتارعا قول جەتكىزدى؛ تاۋار بەلگىسىنە زياتكەرلىك مەنشىك قۇقىعى، سونداي-اق كلۋب تۇستەرى-پەتروپاۆل تۇرعىندارىنىڭ سۇيىكتى فۋتبول كومانداسى بۇرىنعىداي قىزىل-قارا تۇستەردە وينايتىن بولادى.
الدىڭعى قۇقىق يەسى كلۋبتى قفف، FIFA، UEFA جانە CAS زاڭدى (سوت) ورگاندارىندا قارالاتىن ىستەرگە، سونداي-اق قۇقىقتار مەن مىندەتتەر بەرىلگەننەن كەيىن تۋىنداۋى مۇمكىن ىستەر بويىنشا قاتىسۋعا تارتۋمەن بايلانىستى جاعىمسىز سالداردىڭ تۋىنداۋىن بولدىرماۋعا مىندەتتەنەدى. ال مۇنداي داۋلار تۋىنداعان جاعدايدا الدىنعى قۇقىق يەسى ولاردى ءوز كۇشىمەن شەشۋگە مىندەتتەنەدى.
كلۋبتى سولتۇستىك قازاقستان وبلىسىنىڭ اكىمدىگىمەن بىرلەسىپ قارجىلاندىرۋ تۋرالى ۋاعدالاستىققا قول جەتكىزىلدى.
سونداي-اق، كوماندانىڭ نەگىزگى قۇرامى ءۇشىن جايلى تۇرعىن ءۇي جاعدايلارىن جاساۋعا مۇمكىندىك بەرەتىن جاڭا سپورتتىق بازا سالۋ جوسپارلانۋدا. بۇل جوبانى ىسكە اسىرۋ كلۋبتىڭ ماتەريالدىق-تەحنيكالىق بازاسىن نىعايتۋعا مۇمكىندىك بەرەدى.
سونىمەن قاتار، پەتروپاۆلداعى «قاراساي» ستاديونى كلۋبتىڭ سەنىمگەرلىك باسقارۋىنا بەرىلەدى. قازىرگى ۋاقىتتا ۋاكىلەتتى ورگاندارمەن كەلىسسوزدەر مەن كەلىسۋ راسىمدەرى جۇرگىزىلۋدە. ستاديوندى كلۋبتىڭ باسقارۋىنا بەرۋ ينفراقۇرىلىمدى ءتيىمدى پايدالانۋعا، وقۋ پروسەسى مەن ءۇي ماچتارىن وتكىزۋ ءۇشىن جاعدايدى جاقسارتۋعا، سونداي-اق وڭىردە فۋتبول ءىس-شارالارىن ۇيىمداستىرۋ دەڭگەيىن ارتتىرۋعا مۇمكىندىك بەرەدى.
«قىزىل-جار» فۋتبول كومانداسىنىڭ باس مەنەدجەرى بولىپ الىشەر اپسالياموۆ تاعايىندالدى. ونىڭ قىزمەتتىك تىزىمىندە: «Sarajevo» (بوسنيا جانە گەرسەگوۆينا)، «Cardiff City» (ۇلىبريتانيا، ۋەلس)، «قايرات» (الماتى)، «كاسپيي» (اقتاۋ)، «اتىراۋ» (اتىراۋ)، «توبىل» (قوستاناي) فۋتبول كلۋبتارىندا ەڭبەك تاجىريبەسى بار.
«جاقىن ارادا «QYZYLJAR» فۋتبولشىلارىنىڭ جوسپارىندا – تۇركياداعى وقۋ-جاتتىعۋ جيىندارى، وندا ءبىر جارىم اي ىشىندە الداعى ماۋسىمعا ارنالعان ويىن كومانداسىنىڭ قۇرامى ايقىندالادى. كلۋب مەنەدجمەنتى قازاقستاندىق جانە حالىقارالىق نارىقتى زەردەلەي وتىرىپ، فۋتبولشىلاردى مۇقيات تالداۋ جانە ىرىكتەۋ جۇرگىزەتىن بولادى»، - دەپ اتاپ ءوتتى الىشەر اپسالياموۆ.
«QYZYLJAR» فۋتبول كلۋبى قازاقستان رەسپۋبليكاسى پرەزيدەنتىنىڭ تاپسىرماسىنا سايكەس جەكەشەلەندىرۋ ۇدەرىسىنەن العاشقىلاردىڭ ءبىرى بولىپ ءوتتى. بۇل قادام باسقارۋدىڭ تيىمدىلىگىن ارتتىرۋعا، قارجىلىق تۇراقتىلىقتى نىعايتۋعا جانە ءوڭىردىڭ فۋتبول ينفراقۇرىلىمىن دامىتۋعا ينۆەستيسيالار تارتۋ ءۇشىن جاڭا مۇمكىندىكتەر جاساۋعا باعىتتالعان.
كوماندا جاڭا ماۋسىمدى جاڭارتىلعان فورماتتا - جەكە وتاندىق ينۆەستورمەن، كۇشەيتىلگەن قۇراممەن جانە كلۋبتى دامىتۋعا زاماناۋي كوزقاراسپەن باستايدى.
