قازاقستان مۇسىلماندارى ءدىني باسقارماسىنىڭ باسپا ءسوز قىزمەتى بيىل قۇربان ايتتىڭ باستالۋ مەرزىمىن جاريالادى، دەپ حابارلايدى Dalanews.kz.
بيىل حيجرا كۇنتىزبەسىنە سايكەس، ءزۇلحيججا ايى باستالدى. جاڭا ايدىڭ تۋۋىنا بايلانىستى، بۇل اي 28 مامىردا كىردى. وسىعان وراي ارافا كۇنى – 5 ماۋسىمعا، ال قاسيەتتى قۇربان ايت مەرەكەسىنىڭ ءبىرىنشى كۇنى – 6 ماۋسىمعا سايكەس كەلەدى.
ءدىني باسقارما ءمالىم ەتكەندەي، قۇربان ايت نامازىنان كەيىن ءۇش كۇن بويى قۇربان شالۋ – شاماسى جەتەتىن مۇسىلمان ءۇشىن مىندەت.
“قۇربان ايت – مۇسىلمان قاۋىمى ءۇشىن قاسيەتتى دە، ساۋاپتى امالدارعا تولى ۇلىق مەيرام. بۇل كۇندەرى اللا رازىلىعى ءۇشىن قۇربان شالىپ، بىر-بىرىنە ىزگى تىلەك ءبىلدىرۋ، مۇقتاج جاندارعا كومەك قولىن سوزۋ – ۇلكەن ساۋاپ”، – دەلىنگەن حابارلامادا.
