جاقسىلىق جاساۋدان جارىسۋ – ءتىلىڭ جەتكەنشە تامسانا ايتا جۇرەتىن تاماشا جارىس دەسەم ارتىق ايپاعانىم.
بۇگىندە ءوڭىرىمىزدىڭ بەلدى ازاماتتارى مۇقتاج جانداردى ازىق-تۇلىكپەن قامتاماسىز ەتىپ قانا قويماي، اۋدانداعى ىرگەلى ىستەرگە ۇيىتقى بولۋدا. وسى ورايدا، الاكول اۋدانىنىڭ باس يمامى ءا. ومارحان ۇلى باستاعان اۋداندىق ورتالىق مەشىت جاماعاتى جانە ايدىندى ولكەمىزدىڭ تۋماسى، جەكە كاسىپكەر ايدىن ايحان ۇلى 50 وتباسىنا 40 مىڭ تەڭگە كولەمىندە قارجىلاي كومەك كورسەتىپ، ازىق-تۇلىك سەبەتتەرىن تابىس ەتىپ، كەلىپ جەتكەن ۇلى مەرەكە قۇربان ايت مەرەكەسىمەن قۇتتىقتادى.
ايتا كەتەرلىگى، ەلىمىزدە ورىن العان ىندەت كەزىندە دە اۋدانداعى دۇكەن، ءدامحانا يەلەرى، جەكەلەگەن كاسىپكەرلەر ءبىر جەڭنەن قول، ءبىر جاعادان باس شىعارىپ، زەينەتكەرلەرگە، الەۋمەتتىك جاعىنان از قامتىلعان جانە كوپ بالالى وتباسىلارعا قولدان كەلگەنشە كومەك كورسەتە ءبىلدى.
– قازاقتىڭ «بىرلىك بار جەردە تىرلىك بار» دەيتىنى، جاناشىرلىق لەبى ەسىپ تۇراتىن ءىس-قيمىلدان كورىنەدى. بىرلىگى بەكەم بولعان سوڭ بۇل ولكەدەگى كەي شارۋا ەل جايىن ويلاعان ازاماتتاردىڭ ىمىرالاسقان قولعابىسىمەن-اق شەشىلۋدە. بۇگىن قۇربان ايت كۇنىنە وراي اۋدانىمىزدىڭ ءبىرتۋار ازاماتى ايدىن باۋىرىمىز قۇرباندىق شالىپ، 50 وتباسىنا 40 مىڭ تەڭگە كولەمىندە قارجىلاي كومەك كورسەتتى. سونىمەن قاتار، اۋدان ازاماتتارىنا ازىق-تۇلىك (10 كگ ماكارون، كۇرىش، 5 ل سۇيىق ماي، 30 كگ كارتوپ، 20 كگ پياز جانە 50 كگ ۇن) سەبەتتەرىن تابىستاپ، مەرەكەلەرىمەن قۇتتىقتادى. وسىنداي ەل ازاماتتارىنا ۇلگى بولار نار باۋىرلارىمىزدىڭ قاتارى كوبەيە بەرسىن» – دەدى اۋداننىڭ باس يمامى انەت ومارحان ۇلى.
دانا حالقىمىزدىڭ، «كورشى حاقىسى، ءتاڭىر اقىسى» – دەگەن، استارىنا اتان تۇيەگە جۇك بولار مازمۇن ۇيالاتقان اتالى ءسوزى بار.
«بارشا مۇسىلمان قاۋىمدى كەلىپ جەتكەن ايتۋلى مەرەكە قۇربان ايت مەرەكەسىمەن قۇتتىقتايمىن. بۇگىن قۇرباندىق شالىپ، كومەگىن كورسەتىپ، نيەتىن ءبىلدىرىپ وتىرعان ايدىن باۋىرىمىزعا اللا تاعالا ەكى دۇنيەدە دە مول ساۋاپتان جازىپ، باقىتقا كەنەلتسىن دەگىم كەلەدى. بالالارىمنىڭ، وتباسىمنىڭ اتىنان العىسىمدى بىلدىرەمىن» – دەدى قارابۇلاق اۋىلىنىڭ تۇرعىنى س.دۇيسەبايەۆا.
بىرلىك بار جەردە تىرلىكتىڭ بار ەكەندىگى ءالميساقتان بەلگىلى. ايبىنى اسقاق ايدىندى الاكولىمىزدىڭ جومارت جاندى ازاماتتارىنىڭ بىرلىگى بەكەم، مارتەبەلەرى مىعىم بولعاي.
قاسيەت ارستان،
الاكول اۋدانى اكىمىنىڭ
ءباسپاسوز-حاتشىسى
