Jaqsylyq jasaýdan jarysý – tiliń jetkenshe tamsana aita júretin tamasha jarys desem artyq aipaǵanym.
Búginde óńirimizdiń beldi azamattary muqtaj jandardy azyq-túlikpen qamtamasyz etip qana qoimai, aýdandaǵy irgeli isterge uiytqy bolýda. Osy oraida, Alakól aýdanynyń bas imamy Á. Omarhanuly bastaǵan aýdandyq ortalyq meshit jamaǵaty jáne aidyndy ólkemizdiń týmasy, jeke kásipker Aidyn Aihanuly 50 otbasyna 40 myń teńge kóleminde qarjylai kómek kórsetip, azyq-túlik sebetterin tabys etip, kelip jetken uly mereke Qurban ait merekesimen quttyqtady.
Aita keterligi, elimizde oryn alǵan indet kezinde de aýdandaǵy dúken, dámhana ieleri, jekelegen kásipkerler bir jeńnen qol, bir jaǵadan bas shyǵaryp, zeinetkerlerge, áleýmettik jaǵynan az qamtylǵan jáne kóp balaly otbasylarǵa qoldan kelgenshe kómek kórsete bildi.
– Qazaqtyń «Birlik bar jerde tirlik bar» deitini, janashyrlyq lebi esip turatyn is-qimyldan kórinedi. Birligi bekem bolǵan soń bul ólkedegi kei sharýa el jaiyn oilaǵan azamattardyń ymyralasqan qolǵabysymen-aq sheshilýde. Búgin Qurban ait kúnine orai aýdanymyzdyń birtýar azamaty Aidyn baýyrymyz qurbandyq shalyp, 50 otbasyna 40 myń teńge kóleminde qarjylai kómek kórsetti. Sonymen qatar, aýdan azamattaryna azyq-túlik (10 kg makaron, kúrish, 5 l suiyq mai, 30 kg kartop, 20 kg piiaz jáne 50 kg un) sebetterin tabystap, merekelerimen quttyqtady. Osyndai el azamattaryna úlgi bolar nar baýyrlarymyzdyń qatary kóbeie bersin» – dedi aýdannyń bas imamy Ánet Omarhanuly.
Dana halqymyzdyń, «Kórshi haqysy, táńir aqysy» – degen, astaryna atan túiege júk bolar mazmun uialatqan ataly sózi bar.
«Barsha musylman qaýymdy kelip jetken aitýly mereke Qurban ait merekesimen quttyqtaimyn. Búgin qurbandyq shalyp, kómegin kórsetip, nietin bildirip otyrǵan Aidyn baýyrymyzǵa Alla taǵala eki dúniede de mol saýaptan jazyp, baqytqa keneltsin degim keledi. Balalarymnyń, otbasymnyń atynan alǵysymdy bildiremin» – dedi Qarabulaq aýylynyń turǵyny S.Dúisebaeva.
Birlik bar jerde tirliktiń bar ekendigi álmisaqtan belgili. Aibyny asqaq aidyndy Alakólimizdiń jomart jandy azamattarynyń birligi bekem, mártebeleri myǵym bolǵai.
Qasiet ARSTAN,
Alakól aýdany ákiminiń
baspasóz-hatshysy
