بۇل رەتتە وسىنداي پروبلەمالارعا تاپ بولعان ازاماتتار ەلىمىزدىڭ ىشكى ىستەر ءمينيسترىنىڭ بلوگىنا شاعىم جازۋدى نەمەسە اۋماقتىق ىشكى ىستەر ورگاندارىنا تىكەلەي جۇگىنبەي، الەۋمەتتىك جەلىلەردە ءبولىسۋدى قالايدى. وسىعان بايلانىستى، حالىق اراسىندا قۇقىقتىق ءتۇسىندىرۋ جۇمىستارىن جۇرگىزۋ، ازاماتتاردىڭ ىشكى ىستەر ورگاندارىنا دەگەن سەنىمىن ارتتىرۋ ماقساتىندا جۋىردا عانا شۋ اۋداندىق پوليسيا ءبولىمى اۋدان ورتالىعى تولە بي اۋىلىندا جانە شۋ قالاسىنداعى ورتالىق بازار ماڭىندا «جولدا قابىلداۋ» اكسياسىن ۇيىمداستىردى. راسىن ايتۋ كەرەك، بۇگىنگى تاڭدا تۇرعىنداردىڭ باسىم كوپشىلىگى قۇقىق قورعاۋ قىزمەتكەرلەرىنىڭ جۇمىس ساپاسىنا سەنىمسىزدىكپەن قاراپ جاتادى. ەلىمىزدىڭ تۇڭعىش پرەزيدەنتى – نۇرسۇلتان نازارابايەۆ تا ءوزىنىڭ وتكەن جىلعى حالىققا جولداۋىندا ءدال وسى قۇقىق قورعاۋ قىزمەتكەرلەردىڭ بىلىكتىلىگىن ارتتىرۋعا بايلانىستى ءبىرقاتار تاپسىرمالار بەرگەن بولاتىن. سوعان سايكەس، بيىلعى جىلى پوليسەيلەردى سىناقتان وتكىزۋ ماسەلەسى كۇن تارتىبىنە قويىلىپ، ءبىرقاتار وزگەرىستەر ورىن الماقشى. وسىعان قاراپ-اق، جۋىق ارادا پوليسيا قىزمەتكەرلەرى مەن قاراپايىم حالىقتىڭ اراسىنداعى بايلانىس نىعايا تۇسەتىنىن اڭعارۋعا بولادى.
مىنە، جوعارىدا اتالعان ءىس-شارا دا قۇقىق قورعاۋ قىزمەتكەرلەرىنىڭ حالىققا ءبىر قادام جاقىنداۋىنىڭ، ولاردىڭ پىكىرىمەن ساناسۋدىڭ جارقىن كورىنىسى بولسا كەرەك-تى. ەكى كۇنگە سوزىلعان اتالمىش شارا تاڭەرتەڭگى 9:00-دەن كەشكى 19:00-گە دەيىن وتكىزىلىپ، جەرگىلىكتى تۇرعىندار تاراپىنان قويىلعان سۇراقتارعا پوليسيا ءبولىمىنىڭ قىزمەتكەرلەرى ماردىمدى جاۋاپتار قايىردى.
جامبىل وبلىسى
شۋ اۋدانى
