Qazaqstan Respýblıkasy İshki ister mınıstrliginiń 2019 jylǵy 2 sáýirdegi №1-51151/1096-I sandy nusqaýyna sáıkes, azamattardyń ótinishterine taldaý qorytyndysy boıynsha qazirgi tańda turǵyndar tarapynan jol qaýipsizdigin qamtamasyz etý problemalaryna qatysty jáne kóshi-qon zańnamasynyń saqtalýyna, onyń ishinde memlekettik qyzmetterdi kórsetý bóligindegi avtokólikterdi tirkeý, júrgizýshi kýálikterin berý, jol júrisin uıymdastyrý, kólik quraldaryn qaıta jabdyqtaý, sondaı-aq ákimshilik quqyq buzýshylyq úshin aıyppul tóleýge qatysty suraqtar jıi qoıylatyndyǵy anyqtalǵan. Odan bólek, patrúldik polısıa qyzmetkerleriniń zańsyz áreketterine qatysty halyqtan shaǵymdar kóp kelip túsetin kórinedi.

Bul rette osyndaı problemalarǵa tap bolǵan azamattar elimizdiń İshki ister mınıstriniń blogyna shaǵym jazýdy nemese aýmaqtyq ishki ister organdaryna tikeleı júginbeı, áleýmettik jelilerde bólisýdi qalaıdy. Osyǵan baılanysty, halyq arasynda quqyqtyq túsindirý jumystaryn júrgizý, azamattardyń ishki ister organdaryna degen senimin arttyrý maqsatynda jýyrda ǵana Shý aýdandyq polısıa bólimi aýdan ortalyǵy Tóle bı aýylynda jáne Shý qalasyndaǵy ortalyq bazar mańynda «Jolda qabyldaý» aksıasyn uıymdastyrdy. Rasyn aıtý kerek, búgingi tańda turǵyndardyń basym kópshiligi quqyq qorǵaý qyzmetkerleriniń jumys sapasyna senimsizdikpen qarap jatady. Elimizdiń Tuńǵysh Prezıdenti – Nursultan Nazarabaev ta óziniń ótken jylǵy halyqqa Joldaýynda dál osy quqyq qorǵaý qyzmetkerlerdiń biliktiligin arttyrýǵa baılanysty birqatar tapsyrmalar bergen bolatyn. Soǵan sáıkes, bıylǵy jyly polıseılerdi synaqtan ótkizý máselesi kún tártibine qoıylyp, birqatar ózgerister oryn almaqshy. Osyǵan qarap-aq, jýyq arada polısıa qyzmetkerleri men qarapaıym halyqtyń arasyndaǵy baılanys nyǵaıa túsetinin ańǵarýǵa bolady.

Mine, joǵaryda atalǵan is-shara da quqyq qorǵaý qyzmetkerleriniń halyqqa bir qadam jaqyndaýynyń, olardyń pikirimen sanasýdyń jarqyn kórinisi bolsa kerek-ti. Eki kúnge sozylǵan atalmysh shara tańerteńgi 9:00-den keshki 19:00-ge deıin ótkizilip, jergilikti turǵyndar tarapynan qoıylǵan suraqtarǵa polısıa bóliminiń qyzmetkerleri mardymdy jaýaptar qaıyrdy.

 

Jambyl oblysy

Shý aýdany