Jambyl oblysynda balany urǵan er adamǵa qatysty qylmystyq is qozǵaldy. Oqiǵanyń videosy áleýmettik jelide taraǵannan keiin kúdikti ýaqytsha ustaý izoliatoryna qamaldy, dep habarlaidy dalanews.kz.
Jelide jariialanǵan kadrlardan qolyna dombyra ustaǵan er adamnyń balany birneshe ret urǵanyn kórýge bolady. Qoldanýshylar oqiǵa Qordai aýdanyndaǵy úiirmelerdiń birinde bolǵanyn jazǵan.
Jambyl oblystyq politsiia departamentiniń málimetinshe, tergeý kámeletke tolmaǵan balany tárbieleý mindetterin tiisinshe oryndamaý deregi boiynsha júrgizilip jatyr.
«Kúdikti ustalyp, ýaqytsha ustaý izoliatoryna qamaldy. Qazirgi ýaqytta balanyń ómiri men densaýlyǵyna qaýip tónip turǵan joq», dep habarlady politsiia.
Keiin kúdikti áleýmettik jeli arqyly úndeý jasap, oqiǵanyń bir jyl buryn bolǵanyn málimdedi. Onyń aitýynsha, videodaǵy bala ózinen sabaq alǵan. Er adam oqýshy men onyń ata-anasynan keshirim surap, áreketin emotsiiaǵa berilýimen túsindirgen.
«Muǵalimge múlde jaraspaityn áreketke bardym. Ózimdi aqtamaimyn jáne kinámdi tolyq moiyndaimyn. Zań aldynda jaýap berýge daiynmyn», - dedi ol.
Qazir politsiia oqiǵanyń barlyq mán-jaiyn anyqtap jatyr. Tergeý qorytyndysy boiynsha tiisti protsessýaldyq sheshim qabyldanady.
