17 اقپان كۇنى راديو وزودي تانىسقان 12 بەتتىك بىرلەسكەن باياندامادا قۇقىق قورعاۋشىلار تاجىكستاننىڭ يسلامدىق وركەندەۋ پارتياسىنىڭ جانە «24 توبىنىڭ» قىزمەتىنە رۇقسات ەتۋدى تالاپ ەتكەن. رەسپۋبليكانىڭ جوعارعى سوتىنىڭ شەشىمىمەن، بۇل قوعامدىق ۇيىمداردىڭ قىزمەتىنە ەل اۋماعىندا تىيىم سالىنعان.
HRW جانە NHC تاجىكستانداعى ادام قۇقىقتارىنا قاتىستى جاعداي بىلتىرعى جىلدىڭ قىركۇيەگىندە ەل بيلىگى ورتالىق ازياداعى جالعىز يسلامدىق پارتيا قىزمەتىن زاڭسىز تانىعالى بەرى كۇرت ناشارلاپ كەتكەنىن ايتادى.
تۇركيا جانە مولدوۆاداعى 30 تاجىك ساياسي بەلسەندىسىنىڭ سوزدەرىنە سۇيەنگەن بايانداما اۆتورلارى تاجىك بيلىگىنىڭ قارسىلاستارىن قاماۋعا الىپ، ازاپتايتىنىن مالىمدەدى.
مۇنداي جاعداي رەسمي دۋشانبەنىڭ سۇراۋىمەن تاجىكستاننان تىسقارى جەردە ۇستالعان تاعى ونشاقتى وپپوزيسيونەردىڭ باسىنا ءتۇسۋى مۇمكىن. تاجىك ۇكىمەتى بەلارۋس، قىرعىزستان، قازاقستان، مولدوۆا، تۇركيا جانە رەسەيدەن سول ەلدەردە ۇستالعان وپپوزيسيونەرلەردى وزىنە بەرۋدى تالاپ ەتۋدە.
باياندامادا سوڭعى جىلدارى تاجىك بيلىگىنىڭ 20 شاقتى قارسىلاسىنىڭ ءارتۇرلى ايىپپەن 3 تەن 29 جىلعا دەيىن سوتتالعانى جازىلعان. تاجىكستاننىڭ يسلامدىق وركەندەۋ پارتياسىنىڭ 200-دەي مۇشەسى مەن بەلسەندىسى تۇرمەدە نەمەسە ءۇي قاماۋىندا وتىر. بايانداما اۆتورلارى ولاردىڭ جەتەۋى ازاپتاۋ كورگەندەرىن ايتقاندارىن جەتكىزدى.
