قۇلسارىدا كوشەنىڭ قاق ورتاسىندا تۇيە تاپتاپ كەتكەن بالانىڭ جاعدايى بەلگىلى بولدى، دەپ حابارلايدى Dalanews.kz.
جىلىوي اۋدانى اكىمدىگى مالىمەتىنشە، 26 قازاندا قۇلسارى قالاسىنىڭ 3-شاعىناۋدانىندا جەرگىلىكتى تۇرعىن يەسىز جۇرگەن تۇيە شابۋىلىنان زارداپ شەگىپ، اۋرۋحاناعا تۇسكەن.
"وعان ءتيىستى مەديسينالىق كومەك كورسەتىلدى، ناۋقاس تراۆماتولوگيا بولىمىندە ەمدەلىپ جاتىر"، - دەدى اكىمدىك وكىلى.
جانۋار ارنايى وقشاۋلانعان ورىنعا قامالعان. مالدىڭ يەسىن انىقتاۋ جۇمىستارى كورشى وبلىسپەن بىرلەسە جۇرگىزىلىپ جاتىر.
"ۆەتەريناريالىق ينسپەكسيانىڭ مالىمەتىنشە، تۇيەنىڭ قۇلاعىنداعى سىرعا ماڭعىستاۋ وبلىسىنا تىركەلگەن، ال جانۋاردىڭ ءوزى دەرەكقوردا جوق. ماماندار ونى قاراپ، قۇتىرۋ، تاعى دا باسقا اۋرۋ بەلگىلەرى انىقتالماعانىن حابارلادى"، - دەدى اكىمدىك وكىلى.
