مەملەكەت قايراتكەرى، ەكس-مينيستر جاقسىبەك قۇلەكەيەۆ جاڭا قازاقستانداعى كادرلار مەن قۇلىبايەۆتاردىڭ بايلىعىنا قاتىستى پىكىر ءبىلدىردى، - دەپ حابارلايدى Dalanews.kz.
قۇلەكەيەۆتىڭ سوزىنشە، قازىرگى تاڭدا قازاقستاننىڭ ساياسي ەليتاسى جاڭارعان.
«جۇيەدە جاڭا، جاس ادامدار كوپ. جاقىندا جاڭا جاس مينيستر دە تاعايىندالدى. (...) مەملەكەتتىك ورگانداردا مەيلىنشە جاقسى دايىندالعان ادامدار بولسا دەيمىن. بۇل جاعىنان ەسكى قازاقستاندا جۇمىس ىستەگەن ادامداردىڭ تاجىريبەسى كوپ. ول كەزدەگى شەنەۋنىكتىڭ ءبارى پاراقور جانە ءبىر ادامعا قىزمەت ەتتى دەپ ايىپتاۋ دۇرىس ەمەس شىعار. ولاردىڭ كوبى ادال قىزمەت اتقاردى جانە قازاقستان حالقىنىڭ مۇڭ-مۇقتاجىن تىڭداپ، جۇمىس ىستەۋگە تىرىستى. سوندىقتان ول جۇيەدە دە لايىق ازاماتتار بار. جاۋاپتى قىزمەتكە ادام تاڭداۋ كەزىندە بەلگىلى ءبىر بالانس كەرەك شىعار. سوندىقتان ادامداردى ەسكى نەمەسە جاڭا قازاقستان وكىلى دەپ ءبولۋدى جاقتامايمىن. بار بولعانى 20 ميلليون ادامبىز، سوندىقتان ءار كادردى باعالاۋىمىز كەرەك. سەبەبى جاقسى ماماندى دايىنداۋعا ءبىراز جىلدار كەتەدى»، - دەيدى جاقسىبەك قۇلەكەيەۆ Elmedia-عا بەرگەن سۇحباتىندا.
سونىمەن قاتار، قۇلەكەيەۆ تيمۋر جانە دينارا قۇلىبايەۆالاردىڭ جىل سايىن بايۋىنا قاتىستى ويىن ايتتى. ونىڭ سوزىنشە، ەكەۋى دە ادال بايىپ جاتىر.
«قازىرگى تاڭدا، ءيا، ولار ادال بايىپ وتىر. سەبەبى ولاردىڭ ءىرى بيزنەسى كوپ. ولار جاس كەزىنەن كاسىپپەن اينالىسا باستادى. ولاردىڭ جان-جاعىندا تالانتتى مەنەدجەرلەر كوپ. قازاقستاندا كوپتەگەن ونەركاسىپ اشتى. سوندىقتان وسى جۇمىستاردىڭ ءبارى ناتيجەسىن بەرىپ وتىر. ەگەر ولارعا جاقسى جاعداي جاسالسا، ولار بۇدان دا كوپ نارسە جاسار ەدى. بۇدان قورقۋدىڭ قاجەتى جوق. ولارعا قازاقستاننىڭ ەكونوميكاسىنا ينۆەستيسيا جاساۋعا مۇمكىندىك بەرۋ كەرەك. ءقازىر بارلىق جەردە «اناۋ جامان، مىناۋ جامان» دەپ ايعايلاي بەرەمىز. سوسىن ولار قازاقستان ەكونوميكاسىنا ينۆەستيسيا سالۋ دۇرىس پا نەمەسە اقشانى سىرتقا شىعارىپ، شەتەلدە بيزنەس دامىتۋ كەرەك پە دەپ ويلانىپ قالادى. ەگەر ولار سالىقتارىن تولەپ، بارلىق مىندەتىن ورىنداپ، مەملەكەتپەن ەسەپتەسىپ قويسا، قالعان اقشانى قالاعانىنشا جۇمساي الادى. ال ءبىز ولار قازاقستان ەكونوميكاسىنا ينۆەستيسيا سالسا دەپ ويلايمىز. ولار قالاي بايىعانى مەنى قىزىقتىرمايدى. مەن جاعدايعا ەكونوميست رەتىندە قارايمىن. ەگەر قازاقستاندىق كاسىپكەردە اقشا بولسا وعان قىزعانىپ قاراۋدىڭ قاجەتى جوق. كەرىسىنشە ولار قازاقستان ەكونوميكاسىنا ينۆەستيسيا جاساۋىنا جاعداي جاساۋ كەرەك»، - دەيدى قۇلەكەيەۆ.
سۇحبات بارىسىندا جاقسىبەك قۇلەكەيەۆ تيمۋر قۇلىبايەۆتىڭ «قازمۇنايگازداعى» ىقپالى تۋرالى ايتتى.
«قازىرگى تاڭدا ونىڭ كومپانيادا ىقپالى قالمادى. جاڭا پرەزيدەنت كەلگەلى، اسىرەسە 2022 جىلعى قاڭتار وقيعاسىنان كەيىن ءبارى «تازارت ىلدى». بۇل جەردە (كومپانيادا) تيمۋر قۇلىبايەۆقا قاتىسى بار ادامدار قالمادى. ءتىپتى كەيبىر ادامداردى ادىلەتسىز جۇمىستان شىعارىپ جىبەرگەن شىعار، ولار «قازمۇنايگازدىڭ» دامۋىنا ۇلەس قوسار ما ەدى؟ ءبىراق بولارى بولدى، بوياۋى ءسىڭدى. قىسقاسى، قۇلىبايەۆ «قازمۇنايگازداعى» ماڭىزدى شەشىمدەر قابىلداۋىنا ەشقانداي اسەر ەتە المايدى»، - دەيدى قۇلەكەيەۆ.
