Memleket qairatkeri, eks-ministr Jaqsybek Qulekeev jańa Qazaqstandaǵy kadrlar men Qulybaevtardyń bailyǵyna qatysty pikir bildirdi, - dep habarlaidy Dalanews.kz.
Qulekeevtiń sózinshe, qazirgi tańda Qazaqstannyń saiasi elitasy jańarǵan.
«Júiede jańa, jas adamdar kóp. Jaqynda jańa jas ministr de taǵaiyndaldy. (...) Memlekettik organdarda meilinshe jaqsy daiyndalǵan adamdar bolsa deimin. Bul jaǵynan eski Qazaqstanda jumys istegen adamdardyń tájiribesi kóp. Ol kezdegi sheneýniktiń bári paraqor jáne bir adamǵa qyzmet etti dep aiyptaý durys emes shyǵar. Olardyń kóbi adal qyzmet atqardy jáne Qazaqstan halqynyń muń-muqtajyn tyńdap, jumys isteýge tyrysty. Sondyqtan ol júiede de laiyq azamattar bar. Jaýapty qyzmetke adam tańdaý kezinde belgili bir balans kerek shyǵar. Sondyqtan adamdardy eski nemese jańa Qazaqstan ókili dep bólýdi jaqtamaimyn. Bar bolǵany 20 million adambyz, sondyqtan ár kadrdy baǵalaýymyz kerek. Sebebi jaqsy mamandy daiyndaýǵa biraz jyldar ketedi», - deidi Jaqsybek Qulekeev Elmedia-ǵa bergen suhbatynda.
Sonymen qatar, Qulekeev Timýr jáne Dinara Qulybaevalardyń jyl saiyn baiýyna qatysty oiyn aitty. Onyń sózinshe, ekeýi de adal baiyp jatyr.
«Qazirgi tańda, iá, olar adal baiyp otyr. Sebebi olardyń iri biznesi kóp. Olar jas kezinen kásippen ainalysa bastady. Olardyń jan-jaǵynda talantty menedjerler kóp. Qazaqstanda kóptegen ónerkásip ashty. Sondyqtan osy jumystardyń bári nátijesin berip otyr. Eger olarǵa jaqsy jaǵdai jasalsa, olar budan da kóp nárse jasar edi. Budan qorqýdyń qajeti joq. Olarǵa Qazaqstannyń ekonomikasyna investitsiia jasaýǵa múmkindik berý kerek. Qazir barlyq jerde «anaý jaman, mynaý jaman» dep aiǵailai beremiz. Sosyn olar Qazaqstan ekonomikasyna investitsiia salý durys pa nemese aqshany syrtqa shyǵaryp, shetelde biznes damytý kerek pe dep oilanyp qalady. Eger olar salyqtaryn tólep, barlyq mindetin oryndap, memleketpen eseptesip qoisa, qalǵan aqshany qalaǵanynsha jumsai alady. Al biz olar Qazaqstan ekonomikasyna investitsiia salsa dep oilaimyz. Olar qalai baiyǵany meni qyzyqtyrmaidy. Men jaǵdaiǵa ekonomist retinde qaraimyn. Eger qazaqstandyq kásipkerde aqsha bolsa oǵan qyzǵanyp qaraýdyń qajeti joq. Kerisinshe olar Qazaqstan ekonomikasyna investitsiia jasaýyna jaǵdai jasaý kerek», - deidi Qulekeev.
Suhbat barysynda Jaqsybek Qulekeev Timýr Qulybaevtyń «Qazmunaigazdaǵy» yqpaly týraly aitty.
«Qazirgi tańda onyń kompaniiada yqpaly qalmady. Jańa prezident kelgeli, ásirese 2022 jylǵy Qańtar oqiǵasynan keiin bári «tazart yldy». Bul jerde (kompaniiada) Timýr Qulybaevqa qatysy bar adamdar qalmady. Tipti keibir adamdardy ádiletsiz jumystan shyǵaryp jibergen shyǵar, olar «Qazmunaigazdyń» damýyna úles qosar ma edi? Biraq bolary boldy, boiaýy sińdi. Qysqasy, Qulybaev «Qazmunaigazdaǵy» mańyzdy sheshimder qabyldaýyna eshqandai áser ete almaidy», - deidi Qulekeev.
