ەكس-پرەزيدەنت نازاربايەۆتىڭ كۇيەۋ بالاسى، وليگارح قۇلىبايەۆ ۇلتتىق پاركتەگى تاعى ءبىر كوتتەدجىنەن ايىرىلۋى مۇمكىن، - دەپ حابارلايدى Dalanews.kz.

فبرك Telegram-ارناسى مالىمەتىنشە، ىلە-الاتاۋ ۇلتتىق پاركى تيمۋر قۇلىبايەۆتىڭ كومپانياسىنا تيەسىلى تاعى ءبىر كوتتەدجدى بۇزۋدى تالاپ ەتىپ وتىر. ساياباق وكىلدەرى بۇل نىسان جەكە ءۇي رەتىندە پايدالانىلادى دەپ وتىر.

ال Nege.Aqsha مالىمەتىنشە، 2011 جىلى نەگىزگى يەسى قۇلىبايەۆ سانالاتىن "كيپروس" ج ش س تالعار اۋدانىنىڭ كوكباستاۋ ورمانشىلىعىنان 2 گەكتار جەر ۋچاسكەسىن پايدالانۋعا العان.

"جەر تۋريستىك قىزمەت ءۇشىن بەرىلگەن، الايدا ول جەردە ءقازىر ءۇي تۇر"، - دەپ جازدى ارنا.

ۇلتتىق ساياباق وكىلدەرى شارتتى بۇزۋدى سۇراپ، سوتقا جۇگىندى، ءبىراق سۋديا داۋدى بەيبىت جولمەن شەشۋگە ارەكەت جاساۋ قاجەت ەكەنىن مالىمدەپ، سوت ءىسىن كەيىنگە قالدىرىپتى.

بۇعان دەيىن "كيپروس" ج ش س ۇلتتىق پارك اۋماعىنداعى باسقا ءۇيدى بۇزىپ، ۋچاسكەنى مەملەكەتكە قايتارۋعا مىندەتتەلگەن بولاتىن. جەر ءتۋريزمدى دامىتۋ ءۇشىن بەرىلگەن، ءبىراق تەكسەرىس كەزىندە كەلۋشىلەر بولماعان.

فبرك مالىمەتىنشە، كومپانيا بۇل نىسان تۋريستىك ماقساتتا پايدالانىلمايدى دەگەن تۇجىرىممەن كەلىسپەيدى جانە ونى ءسۇرۋ تۋرالى شەشىمگە قارسى شىققىسى كەلەدى.

ايتا كەتەيىك، بۇعان دەيىن نازاربايەۆتىڭ ورتانشى كۇيەۋ بالاسى تيمۋر قۇلىبايەۆ ءابۋ-دابيدىڭ وڭشەڭ ىعاي مەن سىعايلار تۇراتىن Nudra Villas اۋدانىندا ۆيللالار كەشەنىنىڭ قۇرىلىسىن اياقتاعان بولاتىن.

Nudra Villas اۋدانىنداعى ۆيللالار كەشەنىنىڭ قۇرىلىس جۇمىستارى 2020 جىلى باستالعان بولاتىن. ءال-سااديات ارالىنداعى كەشەندە ءار ءتۇرلى 32 ۆيللا ورنالاسقان. ازىرشە اۋقىمدى جوبانىڭ قۇنى جايىندا ناقتى اقپارات جوق.