"پەرزەنت" بالالار ءۇيىنىڭ ديرەكتورى ءامينا اجىبايەۆا تاعى ءبىر مالىمدەمە جاسادى، دەپ حابارلايدى Dalanews.kz.

"بۇل كۇندەردى دە وتكىزىپ الدىق. قۇدايىم بۇيىرسا، ءۇيدى باستادىق. ەشنارسە قالماپتى، ءبارى كۇيىپ كەتىپتى. ءقازىر جۇمىس ىستەگەندەرگە اس جاساپ جاتىرمىز. 20 ماشينا سۋ كەتتى. بۇكىل قالانىڭ توتەنشە جاعداي قىزمەتىنە، ناۋرىزباي اۋدانىنىڭ ورتسوندىرۋشىلەرىنە، پوليسيا بولىمىنە، قاراساي اۋدانىنىڭ جىگىتتەرىنە - بارشاڭا راقمەت. مەنىڭ باسىما تۇسكەن كۇن سەندەرگە تۇسپەسىن. بۇل - ماعان ءبىر سىناق، مەن 30 جىل سىناقتىڭ ىشىندە جۇرگەن كىسىمىن. 30 جىلدا نە كورمەدىم؟! جەرتولەدە دە تۇردىم. بۇل كۇندەر دە ءوتىپ كەتەدى"، - دەدى ول.

ءامينا قاجى ەل ىشىندەگى قاۋەسەتكە قاتىستى دا پىكىر ءبىلدىردى.

"ءبىز شوت اشپادىق. نەلىكتەن؟ ءقازىر "ويباي، انا كەمپىر ءۇيىن ورتەپ تاستاپتى" دەگەندەر شىعىپ جاتىر. نەعىلامىن مەن؟! كەرەمەت ءۇيىم تۇرسا. سول وسەك تاراتقاندارعا: قۇداي جازالارىڭدى بەرسىن، ۇيدە وتىرعان الباستى قاتىندار. مەنىڭ عانا شوتىم شىعادى. باسقا ەش جەرگە سالماڭدار. اكەلىپ وتكىزەمىن دەسەڭدەر، وسىندا وتىرمىن. ەشقانداي قينالىپ جاتقان جوقپىز. ەڭ ۇلكەن بەرەكەتىم - بالالارىم امان. بالالارىم شىعىپ ۇلگەرىپتى. ءورت مونشادان كەتكەن. لاپ ەتە تۇسكەن"، - دەدى ول.

بۇعان دەيىنگى جاعداي

ەسكە سالايىق، 9 قاراشادا الماتىدا بالالار ءۇيى ورتەندى. بالالار ءۇيىنىڭ ديرەكتورى ءامينا اجىبايەۆا وسى وقىس وقيعانى پايدالانىپ، اقشا جيناماۋدى سۇرادى.

سونىمەن قاتار، ول مەكەمە ادەيى ورتەلىپ، جەردى يەلەنۋ ماقساتىندا قاساقانا ۇيىمداستىرىلعان دەگەن بولجامدى جوققا شىعاردى.