ق ر پرەزيدەنتى ءىس باسقارماسى مەديسينالىق ورتالىعىنىڭ باسشىسى الەكسەي سوي ماڭعىستاۋ وبلىسىنىڭ اكىمى نۇرلان نوعايەۆپەن ىنتىماقتاستىق تۋرالى مەموراندۋمعا قول قويدى.
كەلىسىم قالا تۇرعىندارىنا دارىگەرلەردىڭ تەگىن كونسۋلتاسيالارىن، ساناتورييلىك-كۋرورتتىق ەمدەۋ جانە مەديسينالىق وڭالتۋ بويىنشا قىزمەتتەردى الۋعا، ال قاجەت بولعاندا جاعدايدا اۋىر ناۋقاستاردى ەمدەۋگە مۇمكىندىك بەرەدى.
سونداي-اق، ورتاق كەلىسىم ناتيجەسىندە ءوڭىردىڭ مەديسينالىق مەكەمە قىزمەتكەرلەرىن وقىتۋ، اۋرۋلاردى الدىن الۋ، دياگنوستيكالاۋ، جاڭا مەديسينالىق تەحنولوگيالار مەن يننوۆاسيالىق ادىستەمەلەرىن دامىتۋ سالاسىندا تاجىريبە الماسۋ تۋرالى كەلىسىمگە قول جەتكىزىلدى.
ماڭعىستاۋ وبلىسىنىڭ اكىمى نۇرلان نوعايەۆ مەموراندۋمنىڭ الداعى ۋاقىتتا وڭىردەگى مەديسينا سالاسىنىڭ دامۋىنا ايتارلىقتاي ىقپال ەتەتىنىنە سەنىم ءبىلدىردى. بۇل ءىس-شارا اياسىندا مەديسينالىق ورتالىقتىڭ ماماندارى ءوز بىلىمدەرى مەن تاجىريبەلەرىمەن بولىسە وتىرىپ، ايماق مەديسيناسىنىڭ دامۋىنا زور ۇلەس قوستى.
ءوز كەزەگىندە، ق ر ءپىب مەديسينالىق ورتالىعىنىڭ باسشىسى مۇنداي ءىس-شارالار جەرگىلىكتى اۋرۋحانالار ماماندارىنىڭ بىلىكتىلىك دەڭگەيىن ارتتىرۋعا كومەكتەسەدى، ال ءوڭىر ازاماتتارى ءۇشىن قولجەتىمدى، ءارى ساپالى مەديسينالىق كومەك الۋىنا مۇمكىندىك بەرەتىنىن اتاپ ءوتتى.
«مەديسينالىق ورتالىق قىزمەتىنىڭ اياسىندا ءبىلىم بەرۋ، عىلىمي زەرتتەۋلەر، سانيتاريالىق-ەپيدەميولوگيالىق زەرتتەۋلەر جۇرگىزۋ، سونداي-اق دەنساۋلىق ساقتاۋ سالاسىندا يننوۆاسيالىق ادىستەردى ىزدەۋ جانە ەنگىزۋ سالاسىندا ءتۇرلى جوبالار ىسكە اسىرىلۋدا.
بۇگىنگى قول قويىلعان مەموراندۋم شەڭبەرىندە وبلىس اكىمدىگىمەن بىرلەسىپ، جول كارتاسى ازىرلەنەتىن بولادى. ونىڭ نەگىزىندە ءبىز بىرنەشە جىل بويى وڭىردە دەنساۋلىق ساقتاۋدى دامىتۋ بويىنشا بەلگىلەنگەن جوسپارلاردى ىسكە اسىراتىن بولامىز» - دەپ، الەكسەي سوي جوسپارىمەن ءبولىستى.
