قوستانايدىڭ ەكس-اكىمىنىڭ مەيرامحاناسى بىرنەشە جىلدان بەرى اۋكسيوندا ساتىلماي تۇر، - دەپ حابارلايدى Dalanews.kz.
قوستانايدىڭ بۇرىنعى اكىمى احمەدبەك احمەتجانوۆتىڭ مەيرامحانا كەشەنى قايتادان ساتىلىمعا شىعارىلدى. اۋكسيون تۋرالى حابارلاندىرۋ ەلەكترون ساۋدا الاڭىندا پايدا بولدى. اۋدانى 1558،4 شارشى مەتر عيمارات 307 397 500 تەڭگە باعامەن اۋكسيونعا شىعارىلدى.
ەلەكترون ساۋدا الاڭى سايتىندا كورسەتىلگەن اقپارات بويىنشا، ساۋدا 2024 جىلدىڭ 13 قاراشاسىندا ساعات 10:00-گە جوسپارلانعان. ساۋدا-ساتتىققا قاتىسۋشىلار ءۇشىن كەپىلدىك جارنا 92 219 250 تەڭگە بولادى. اقپارات بويىنشا، ءبىر قاتىسۋشىعا دا ساتۋعا رۇقسات ەتىلگەنى كورسەتىلگەن.
نىسان قوستاناي وبلىسىندا ەكاتەرينبۋرگ – الماتى تاسجولى بويىندا ورنالاسقان. عيمارات 2014 جىلى 0،1916 گەكتار جەر تەلىمىندە سالىنعان.
بيىلعى مامىردا مۇلىكتىڭ سمەتالىق قۇنى 614 795 000 تەڭگە بولدى. ءقازىر عيمارات اۋكسيونعا شىعارىلىپ، قۇنى ەكى ەسەگە جۋىق تومەندەگەن.
حابارلاندىرۋ بويىنشا، عيمارات "قوستاناي وبلىسى اكىمدىگىنىڭ كاسىپكەرلىك جانە يندۋستريالدى-يننوۆاسيالىق دامۋ باسقارماسى" مەملەكەتتىك مەكەمەسىنىڭ بالانسىندا.
فوتو gosreestr.kz
ايتا كەتەيىك، قوستانايدىڭ بۇرىنعى اكىمىنە تيەسىلى "التىن-ساف" مەيرامحانا كەشەنى 2016 جىلى باستاپقى باعاسى 429 ميلليون 428 مىڭ تەڭگەدەن ساتىلىمعا شىعارىلعان بولاتىن. ءبىراق مۇلىك يەسىن تاپپادى.
2023 جىلدىڭ قاراشا ايىندا عيمارات باستاپقى باعاسى 805 529 000 تەڭگەمەن قايتادان اۋكسيونعا شىعارىلدى. اۋكسيون تاعى ءساتسىز ءوتتى.
ەسكە سالايىق، احمەتبەك احمەتجانوۆقا قاتىستى قوزعالعان قىلمىستىق ءىس اياسىندا قوستاناي قالاسىنىڭ ەكس-اكىمىنەن مەيرامحانا كەشەنىنىڭ عيماراتى تاركىلەنگەن. 2016 جىلدىڭ ساۋىرىندە قوستانايدىڭ بۇرىنعى اكىمى احمەدبەك احمەتجانوۆ 13 جىلعا سوتتالدى.
