قوستانايدا وبلىستىق اۋرۋحانادا دارىگەردى سوققىعا جىققان 34 جاستاعى ابىلايحان سارينجەپوۆكە قاتىستى سوت ۇكىمى شىقتى، دەپ حابارلايدى Dalanews.kz.
ءىس ماتەريالدارىنا سۇيەنسەك، وقيعا 17 شىلدە كۇنى بولعان. ەر ادام بەل ايماعىنداعى قاتتى اۋىرسىنۋعا شاعىمدانىپ، اۋرۋحانانىڭ قابىلداۋ بولىمىنە جۇگىنگەن. الايدا ول ۇزاق كۇتۋگە شىداماي، بىرنەشە رەت مەديسينا قىزمەتكەرلەرىنە نارازىلىعىن بىلدىرگەن.
سول ۋاقىتتا دارىگەر-ۋرولوگ انتون كيستانوۆ وتادان كەيىن بولىمشەگە ءتۇسىپ، پاسيەنتتەردى قابىلداۋدى جالعاستىرعان. سارينجەپوۆتى قاراۋ كەزىندە ولاردىڭ اراسىندا جانجال تۋىنداپ، ناۋقاس دارىگەرگە جۇدىرىق سىلتەگەن. سوققىنىڭ سالدارىنان دارىگەر قابىرعاعا باسىمەن سوعىلىپ، اۋىر جاراقات العان.
مەديسينا قىزمەتكەرىنە ومىرىنە ءقاۋىپ توندىرگەن اۋىر باس-مي جاراقاتى، باس سۇيەگىنىڭ سىنۋى جانە قان قۇيىلۋ دياگنوزى قويىلعان.
سوت بارىسىندا سارينجەپوۆ ءوز ارەكەتىن «توتەنشە اۋىرسىنۋ، ۇزاق كۇتۋ جانە دارىگەردىڭ دورەكى سويلەگەنى» سەبەپ بولدى دەپ ءتۇسىندىردى. الايدا ونىڭ بۇل ۋاجدەرى ءىستىڭ ءمان-جايىن جەڭىلدەتكەن جوق.
بەلگىلى بولعانداي، ايىپتالۋشىنىڭ بۇرىن دا قىلمىستىق جاۋاپكەرشىلىككە تارتىلعانى انىقتالعان: ول بۇعان دەيىن توناۋ ءىسى بويىنشا شارتتى جازا العان جانە كولىك جۇرگىزۋ كۋالىگىنسىز رولگە وتىرعانى ءۇشىن قوعامدىق جۇمىسقا تارتىلعان.
سوت سارينجەپوۆتىڭ ارەكەتىن ق ر قىلمىستىق كودەكسىنىڭ 114-بابى، 3-بولىگى بويىنشا – «ابايسىزدا ادام دەنساۋلىعىنا اۋىر زيان كەلتىرۋ» دەپ سارالادى.
"پروكۋرور التى اي باس بوستاندىعىنان ايىرۋ جازاسىن سۇرادى. سارينجەپوۆ كىناسىن مويىنداعانىمەن، شىنايى وكىنىش بىلدىرمەدى. سوت ونىڭ كامەلەتكە تولماعان بالالارى بار ەكەنىن جەڭىلدەتەتىن جاعداي رەتىندە ەسكەرىپ، ال بۇرىنعى سوتتالعانىن اۋىرلاتاتىن ءمان-جاي رەتىندە قاراستىردى. ناتيجەسىندە وعان 6 اي باس بوستاندىعىنان ايىرۋ جازاسى تاعايىندالدى"، — دەلىنگەن سوت حابارلاماسىندا.
جابىرلەنۋشى دارىگەردىڭ 2 ميلليون تەڭگە كولەمىندەگى مورالدىق وتەماقى تۋرالى تالابى تولىق قاناعاتتاندىرىلدى.
ۇكىم ءالى زاڭدى كۇشىنە ەنگەن جوق.
