Qostanaida oblystyq aýrýhanada dárigerdi soqqyǵa jyqqan 34 jastaǵy Abylaihan Sarinjepovke qatysty sot úkimi shyqty, dep habarlaidy Dalanews.kz.
Is materialdaryna súiensek, oqiǵa 17 shilde kúni bolǵan. Er adam bel aimaǵyndaǵy qatty aýyrsynýǵa shaǵymdanyp, aýrýhananyń qabyldaý bólimine júgingen. Alaida ol uzaq kútýge shydamai, birneshe ret meditsina qyzmetkerlerine narazylyǵyn bildirgen.
Sol ýaqytta dáriger-ýrolog Anton Kistanov otadan keiin bólimshege túsip, patsientterdi qabyldaýdy jalǵastyrǵan. Sarinjepovti qaraý kezinde olardyń arasynda janjal týyndap, naýqas dárigerge judyryq siltegen. Soqqynyń saldarynan dáriger qabyrǵaǵa basymen soǵylyp, aýyr jaraqat alǵan.
Meditsina qyzmetkerine ómirine qaýip tóndirgen aýyr bas-mi jaraqaty, bas súieginiń synýy jáne qan quiylý diagnozy qoiylǵan.
Sot barysynda Sarinjepov óz áreketin «tótenshe aýyrsyný, uzaq kútý jáne dárigerdiń dóreki sóilegeni» sebep boldy dep túsindirdi. Alaida onyń bul ýájderi istiń mán-jaiyn jeńildetken joq.
Belgili bolǵandai, aiyptalýshynyń buryn da qylmystyq jaýapkershilikke tartylǵany anyqtalǵan: ol buǵan deiin tonaý isi boiynsha shartty jaza alǵan jáne kólik júrgizý kýáliginsiz rólge otyrǵany úshin qoǵamdyq jumysqa tartylǵan.
Sot Sarinjepovtiń áreketin QR Qylmystyq kodeksiniń 114-baby, 3-bóligi boiynsha – «Abaisyzda adam densaýlyǵyna aýyr ziian keltirý» dep saralady.
"Prokýror alty ai bas bostandyǵynan aiyrý jazasyn surady. Sarinjepov kinásin moiyndaǵanymen, shynaiy ókinish bildirmedi. Sot onyń kámeletke tolmaǵan balalary bar ekenin jeńildetetin jaǵdai retinde eskerip, al burynǵy sottalǵanyn aýyrlatatyn mán-jai retinde qarastyrdy. Nátijesinde oǵan 6 ai bas bostandyǵynan aiyrý jazasy taǵaiyndaldy", — delingen sot habarlamasynda.
Jábirlenýshi dárigerdiń 2 million teńge kólemindegi moraldyq ótemaqy týraly talaby tolyq qanaǵattandyryldy.
Úkim áli zańdy kúshine engen joq.
