قوستاناي وبلىسىندا سۋ تاسقىنىنان زارداپ شەككەندەرگە وتەماقى تولەۋ باستالدى، – دەپ حابارلايدى Dalanews.kz.
بۇگىن جالپى سومماسى 18 ميلليون تەڭگەنى قۇرايتىن كومەككە تۇرعىندار قول جەتكىزدى. وڭىردە سۋ تاسقىنى سالدارىن جويۋ جۇمىستارى قارقىندى ءجۇرىپ جاتىر.
قوستاناي وبلىسىنداعى 3 اۋداننىڭ اۋماعىنداعى سۋ تاسقىنىنان كەلتىرىلگەن زالالدى باعالاۋ جونىندەگى كوميسسيا ءوز جۇمىسىن باستاعانىن ايتا كەتۋىمىز كەرەك. ولار – امانگەلدى، جانگەلدى جانە ارقالىق قالاسى.
وبلىس اكىمى جەدەل كومەك كورسەتۋ، بارلىق مۇمكىن رەسۋرستاردى تارتۋ بويىنشا ناقتى تاپسىرمالار بەرگەن.
– ۇيگە جارتى ساعاتقا سۋ كىرسە دە، بۇل وتباسىلار زارداپ شەكتى. ەشكىم مەملەكەتتىڭ كومەگىنسىز قالماۋى ءتيىس، – دەپ اتاپ ءوتتى وبلىس اكىمى قۇمار اقساقالوۆ.
29 ناۋرىزدان باستاپ توتەنشە جاعداي رەجيمى جاريالانعاننان كەيىن قوستاناي وبلىسىندا سۋ تاسقىنىنان زارداپ شەككەندەرگە العاشقى تولەمدەر تولەنە باستالدى. سۋ تاسقىنىنان زارداپ شەككەن وتباسىنىڭ ءاربىر مۇشەسىنە 100 مىڭ تەڭگەدەن وتەماقى الا الادى. شامامەن ءبىر وتباسىنا ورتا ەسەپپەن 500-600 مىڭ تەڭگە بولىنەدى.
بۇل تولەمدەر تۇرعىن ءۇيدى جالعا الۋ، ازىق-تۇلىك، كيىم-كەشەك ساتىپ الۋ سىندى نەگىزگى قاجەتتىلىكتەرگە جۇمساۋ كوزدەلگەن.
ءبىرىنشى كەزەكتەگى تولەمدەردەن باسقا اتاۋلى الەۋمەتتىك كومەك، سونداي-اق جىلجىمالى، جىلجىمايتىن مۇلىك پەن مالدى قالپىنا كەلتىرۋگە قاراجات قاراستىرىلعان.
