«بايتاق» جاسىلدار پارتياسىنىڭ رەسپۋبليكالىق شتابى ەلوردانىڭ بوتانيكالىق باعىندا ەكولوگيالىق مارافوننان جانە قاتىسۋشىلاردى پارتيانىڭ سايلاۋالدى تۇعىرناماسىمەن تانىستىرۋدان تۇراتىن ءىس-شارا ۇيىمداستىرىپ، وتكىزدى.

اۋا رايىنىڭ قولايسىزدىعىنا قاراماستان، ۇيىمداستىرۋشىلار جارىستى جەڭىل رەجيمدە وتكىزدى. سونىمەن، قاتىسۋشىلار ءوز تاڭداۋى بويىنشا 2،5-تەن 5 شاقىرىمعا دەيىنگى قاشىقتىقتى ەڭسەردى.

«بايتاق» پارتياسى جىل بويى جانە كەز كەلگەن اۋا رايى جاعدايىندا دەنساۋلىقتى جاقسارتۋمەن اينالىسۋعا بولاتىنىن كورسەتتى. مارافون بوتانيكالىق باقتاعى ارنايى جۇگىرۋ جولدارى مەن تازا اۋادا ىڭعايلى جاعدايدا ءوتتى.

ءىس-شارا سوڭىندا قاتىسۋشىلار نەگىزى ەكولوگيالىق پروبلەمالاردى شەشۋ جانە قورشاعان ورتا مەن ادامداردىڭ دەنساۋلىعىن قورعاۋ بولىپ تابىلاتىن پارتيانىڭ سايلاۋالدى تۇعىرناماسىمەن تانىستى. پارتيالىقتار جينالعانداردىڭ سۇراقتارىنا جاۋاپ بەردى.

«بايتاق» جاسىلدار پارتياسىنىڭ ءتوراعاسى ازاماتحان امىرتايەۆتىڭ ايتۋىنشا، پارتيا ۇگىت-ناسيحات جۇمىستارىن جالعاستىرا وتىرىپ، بۇكىل ەل بويىنشا 1 ميلليونعا جۋىق ادامدى قامتيتىن 3 مىڭنان استام كەزدەسۋ وتكىزدى.

«ءبىز وسىمەن سالاۋاتتى ءومىر سالتى – بۇل ادامداردىڭ، اسىرەسە جاستاردىڭ ءومىرى مەن دەنساۋلىعىنداعى ەڭ ماڭىزدى ماسەلە ەكەنىن كورسەتكىمىز كەلدى»، – دەدى «بايتاق» جاسىلدار پارتياسىنىڭ ءتوراعاسى ازاماتحان امىرتايەۆ.