ونىڭ ايتۋىنشا، پارتيا اتاۋىنان كوممۋنيستىك ءسوزىن الىپ تاستاۋ قاتەلىك.
ۆلاديسلاۆ كوساريەۆ، ءماجىلىس دەپۋتاتى:
- ارىپتەستەرىم پارتيامىزدىڭ اتاۋىنداعى كوممۋنيستىك ءسوزىن الىپ تاستاي وتىرىپ، كەشىرۋگە كەلمەيتىن ساياسي قاتەلىك جاسادى. سول ارەكەتتەرىمەن مەنى ساتىپ كەتتى دەسە بولادى. جالپى كوممۋنيستەر پارتياسىنىڭ پارلامەنتكە ەنۋىنە ايانباي تەر توكتىم. ەندى سونى جوققا شىعارماق. ءارى پارلامەنتتەگى ورىندارىنان ايىرىلىپ قالماۋ ءۇشىن، الدەبىرەۋلەرگە ۇنامايتىن كوممۋنيزم سوزىنەن باس تارتىپ وتىر.
ەستەرىڭىزگە سالا كەتەيىك قازاقستان حالىقتىق كوممۋنيستىك پارتياسى كەزەكتەن تىس سەزىندە اتاۋىن وزگەرتتى. ۇيىم اتاۋىنان "كوممۋنيستىك" ءسوزى الىپ تاستالدى. پارتيا مۇشەلەرىنىڭ باسىم بولىگى رەبرەندينگتى قولداعان. ال ءماجىلىس دەپۋتاتى ۆلاديسلاۆ كوساريەۆ بۇعان ۇزىلدى-كەسىلدى قارسى.
ايتا كەتسەك، ماجىلىستەگى ەڭ ەگدە دەپۋتات جۋىردا عانا 83-كە تولدى. ماجىلىستەگى "حالىق كوممۋنيستەرى" فراكسياسىنىڭ مۇشەسى، حالىقارالىق ىستەر، قورعانىس جانە قاۋىپسىزدىك كوميتەتىنىڭ مۇشەسى. ال حالىقتىق پارتيانىڭ حابارلاۋىنشا، كوساريەۆتىڭ وزىنەن پارتيادان شىعۋ تۋرالى رەسمي ءوتىنىش تۇسپەگەن. ەگەر پارتيادان شىعار بولسا، مانداتىنان ايىرىلىپ، ماجىلىستەگى ورنىن بوساتۋعا مىندەتتەلمەك. كوساريەۆتىڭ ءوزى بولسا، جاقتاستارىن جيناپ، جاڭا پارتيا قۇرۋ ىسىنە كىرىسىپ كەتكەن.
ۆلاديسلاۆ كوساريەۆ، ءماجىلىس دەپۋتاتى:
- تورت-بەس وبلىستا ۇيىمداستىرۋ كوميتەتتەرى جۇمىستارىن باستاپ كەتتى. ولار پارتيا قۇرامىن جاساقتاۋمەن اينالىسىپ جاتىر. بۇل قيىن شارۋا، الدىمىزدا توسقاۋىل كوپ. كوممۋنيستتىك پارتيا تاريحىنىڭ ءوزى كۇرەسكە تولى، سوندىقتان دەمالىستى ىسىرىپ تاستاپ، كوممۋنيزم يدەياسىنىڭ ورنىعۋى ءۇشىن كۇش سالامىن.
