يندونەزيا پوليسياسى اتىراۋ وبلىسىندا جوعالعان وتباسىعا قاتىستى ىستەگى كۇدىكتى كۇيەۋ بالانىڭ سۋرەتىن جاريالادى، دەپ حابارلايدى Dalanews.kz.
سولتۇستىك لومبوك ايماقتىق پوليسياسى قوس كىسى ءولتىرۋ دەرەگى بويىنشا ينتەرپولدىڭ "قىزىل حابارلاماسىنا" ەنگىزىلگەن 29 جاستاعى قازاقستان ازاماتىن قولعا تۇسىرگەن.
"س.س. دەپ كورسەتىلگەن كۇدىكتى سەيسەنبىدە سەنارۋ اۋىلىنداعى قوناقۇيدە ۇستالدى. وپەراسيا يندونەزيا ۇلتتىق پوليسياسىنىڭ حالىقارالىق قاتىناستار باسقارماسىمەن بىرلەسىپ جۇرگىزىلدى. ءتىنتۋ بارىسىندا پوليسيا 30 جاستاعى قازاقستان ازاماتى - M.A.-نى دا ۇستادى. ءقازىر ونىڭ قۇقىقتىق مارتەبەسى ناقتىلانىپ جاتىر. كۇدىكتىلەردەن ءتولقۇجاتتار، ۇيالى تەلەفوندار جانە حالىقارالىق بانك كارتالارى تاركىلەندى. س.س. سولتۇستىك لومبوك پوليسيا باسقارماسىندا قاماۋدا وتىر. ونى قازاقستانعا ەكستراديسيالاۋ ماسەلەسى يندونەزيانىڭ زاڭ جانە ادام قۇقىقتارى مينيسترلىگى ارقىلى قارالىپ جاتىر"، - دەپ جازىلعان يندونەزيا پوليسياسىنىڭ مالىمەتىندە.
ەسكە سالايىق، 24 اقپاندا ىشكى ىستەر مينيسترلىگىنىڭ قىزمەتكەرلەرى شەتەلدىك ارىپتەستەرمەن ءوزارا ءىس-قيمىل ناتيجەسىندە يندونەزيا رەسپۋبليكاسىنىڭ لومبوك ارالىنداعى سەنارۋ اۋىلىندا اسا اۋىر قىلمىس جاسادى دەگەن كۇدىككە ىلىنگەن ەر ادامدى ۇستاعانى حابارلاندى. ول ق ر قىلمىستىق كودەكسىنىڭ 99-بابى 2-بولىگى بويىنشا كۇدىككە ىلىنگەن.
ونىمەن بىرگە بۇعان دەيىن حابار-وشارسىز كەتتى دەپ حالىقارالىق ىزدەۋ جاريالانعان بۇرىنعى جۇبايى دا انىقتالعان.
