ءتىپتى 25%-دان 20% - عا دەيىن تومەندەتىلگەن يپوتەكالىق نەسيە بويىنشا دا جىلدىق ءتيىمدى سىياقى مولشەرلەمەسى (جتسم) قارىز الۋشىلار ءۇشىن اۋىر اۋىرتپالىق بولىپ تابىلادى ءارى ول پروبلەمالىق نەسيەلەردىڭ ارتۋىنا ءقاۋىپ توندىرەدى، دەپ ەسەپتەيدى قارجى نارىعىن رەتتەۋ جانە دامىتۋ اگەنتتىگىنىڭ (اررفر) باسشىسى ءمادينا ءابىلقاسىموۆا. ونىڭ ايتۋىنشا، 20% - بۇل يپوتەكالىق نەسيەلەر ءۇشىن جەتكىلىكتى ۇلكەن مولشەرلەمە، دەپ حابارلايدى Dalanews.kz.
"وزدەرىڭىزگە بەلگىلى، يپوتەكالىق نەسيەلەر ۇزاق مەرزىمگە بەرىلەدى، نەسيە سوماسى دا ۇلكەن، بۇل قارىز الۋشىلار ءۇشىن دە، بانكتەر ءۇشىن دە ايتارلىقتاي تاۋەكەلدەر تۋدىرادى. ءبىز ۇزاق مەرزىمدى پەرسپەكتيۆادا جىلدىق ءتيىمدى مولشەرلەمە بويىنشا 20% - دان جوعارى يپوتەكالىق نەسيەلەردى تۇراقسىز دەپ سانايمىز. ونى الۋشى ادامعا تىم جوعارى قارىز جۇكتەمەسى تۇسەدى"، - دەپ Kapital.kz ءمادينا ءابىلقاسىموۆانىڭ ءسوزىن كەلتىرەدى.
ونىڭ ايتۋىنشا، يپوتەكا بويىنشا جوعارى مولشەرلەمەلەر تولەم قابىلەتى تومەن حالىق ۇلەسىن ارتتىرۋعا جانە بانكتەر پورتفەلىندەگى مەرزىمى وتكەن قارىزداردىڭ وسىمىنە اكەلىپ سوعۋى مۇمكىن.
"قارىز الۋشىلاردىڭ بۇل نەسيەنى ۋاقتىلى وتەۋى ءقاۋپى جوعارى. باستاپقىدا جالعا العانشا يپوتەكالىق نەسيە تولەگەن جاقسى سياقتى كورىنۋى مۇمكىن. ادامدار وسى ويمەن دە قارىزعا باسپانا ساتىپ الادى. ءبىراق جىلدار وتە كەلە نەسيە تولەۋ ادامدى قاجىتادى، قارجىلىق جاعدايى دا ناشارلاۋى مۇمكىن. بانكتەر ءۇشىن قارجىلىق تۇراقتىلىق تۇرعىسىنان مەرزىمى وتكەن قارىزدار سانى دا ۇلعاياتىن بولادى. ءبىزدىڭ قولعا الىپ جاتقان شارالارىمىز جوعارى مولشەرلەمە بويىنشا يپوتەكالىق نەسيەلەندىرۋدى ىنتالاندىرماۋعا باعىتتالعان"، - دەيدى ول
ءمادينا ءابىلقاسىموۆا رەتتەۋشى ورگان 2025 جىلعى 1 قاراشاعا دەيىن ءجتسم-دى 20% عا دەيىن تومەندەتۋ جونىندەگى پروسەستى ۋاقىتشا توقتاتىپ قويعانىن ەسكە سالدى. بۇل بانكتەردىڭ بۇعان دەيىن قابىلداپ قويعان بارلىق وتىنىمدەردى ماقۇلداۋى جانە ولار بويىنشا شارتتار ازىرلەۋى ءۇشىن جاالعان. سونىمەن قاتار، ول 20% مولشەرلەمە يپوتەكا ءۇشىن جەتكىلىكسىز دەپ سانايتىن بانكتەر ۇستانىمىمەن كەلىسپەيتىنىن جەتكىزدى.
"ءبىز بانكتەردىڭ "ۇلتتىق بانكتىڭ بازالىق مولشەرلەمەسى 16،5% بولعاندا يپوتەكالىق نەسيەنىڭ جىلدىق ءتيىمدى سىياقى مولشەرلەمەسىنىڭ 20%-دىق شەگى تىم تومەن" دەپ جاتقانىن ەستىدىك. ۇزاق مەرزىمدى پەرسپەكتيۆادا جىلدىق ءتيىمدى مولشەرلەمە بويىنشا 20% - دان جوعارى يپوتەكالىق نەسيەلەر تۇراقسىز بولىپ تابىلادى. ونىڭ ورنىنا وتباسى بانك قۇرالدارىن پايدالانعان دۇرىس نەمەسە بانكتەرگە وزدەرىنىڭ جەڭىلدىكتى قۇرالدارىن تۇزگەنى دۇرىس. ءبىز ءقازىر بانكتەردىڭ وتباسى بانكىندەگىدەي تۇرعىن ءۇي قۇرىلىس جيناق جۇيەسىنە قاتىساتىنداي ەتۋ ءۇشىن قۇجاتتارمەن جۇمىس ىستەپ جاتىرمىز"، - دەپ ءتۇسىندىردى قنردا باسشىسى.
ماۋسىم ايىندا قنردا مەن ق ر ۇلتتىق بانكىنىڭ بىرلەسكەن قاۋلىسىمەن يپوتەكا بويىنشا ەڭ جوعارى ءجتسم-نىڭ شەكتى مولشەرى 25%-دان 20%-عا دەيىن تومەندەتىلگەنى حابارلاندى. كەيىنىرەك رەتتەۋشى ورگاندار يپوتەكا بويىنشا ەڭ جوعارى مولشەرلەمەنى 20%-عا دەيىن تومەندەتۋ تۋرالى بۇيرىق كۇشىن 2025 جىلدىڭ 1 قاراشاسىنا دەيىن توقتاتتى. وسىلايشا، 2025 جىلعى 1 قاراشاعا دەيىن نەسيەلەردىڭ بارلىق شەكتى مولشەرى مىناداي كۇيدە قالدىرىلدى: يپوتەكالىق تۇرعىن ءۇي قارىزدارى بويىنشا - 25%، كەپىلسىز بانكتىك قارىزدار بويىنشا - 46%، كەپىلمەن قامتاماسىز ەتىلگەن بانكتىك قارىزدار بويىنشا - 3%، ميكروقارجى ۇيىمدارى بەرگەن ميكروكرەديتتەر بويىنشا - 46%. رەتتەۋشى ورگان بانكتەرگە وتپەلى كەزەڭگە ۋاقىت بەرىلگەنىن حابارلادى.
سوڭعى مالىمەتتەرگە سايكەس، وتباسى بانكپەن قاتار Halyk، Kaspi، Forte، CenterCredit سىندى ءىرى كوممەرسيالىق بانكتەر ەندى مەملەكەتتىك قولداۋمەن بەرىلەتىن يپوتەكالىق نەسيە باعدارلامالارىنا قاتىسا الۋى مۇمكىن. ال بۇرىن بۇل مۇمكىندىككە تەك وتباسى بانك قانا يە بولىپ كەلگەن. ازىرگە، وسى ماعىناداعى قۇجات ازىرلەنىپ، ۇشتالىپ جاتىر، ال ول ماجىلىسكە 2025 جىلدىڭ تامىز ايىندا كەلىپ تۇسەتىن كورىنەدى.
