قىزىلوردادا وبلىس اكىمى نۇرلىبەك نالىبايەۆتىڭ قاتىسۋىمەن «قورقىت جانە ۇلى دالا سازى» حالىقارالىق فولكلورلىق-مۋزىكالىق ونەر فەستيۆالىنىڭ اياسىندا «قورقىت مۇراسى: تۇركى الەمىنە ورتاق ەپيكالىق قۇندىلىقتار» اتتى حالىقارالىق عىلىمي-تەوريالىق كونفەرەنسيا ءوتتى، دەپ حابارلايدى Dalanews.kz
القالى جيىنعا «تۇركى مادەنيەتى جانە مۇراسى» قورىنىڭ پرەزيدەنتى اقتوتى رايىمقۇلوۆا، تۇركيا، ازەربايجان، قىرعىزستان، وزبەكستان جانە وتاندىق بەلگىلى عالىمدار، زەرتتەۋشىلەر مەن مادەنيەت مايتالماندارى قاتىستى.
ايماق باسشىسى پرەزيدەنت بەكىتكەن «تۇركى الەمىنىڭ كەلەشەگى – 2040» قۇجاتى اياسىندا ورتاق قۇندىلىقتاردى دارىپتەۋ ماڭىزدى باسىمدىق ەكەنىن اتاپ ايتتى.
«پرەزيدەنتىمىز قاسىم-جومارت كەمەل ۇلى «تۇركى الەمىنىڭ كەلەشەگى – 2040» اتتى قۇجات بەكىتىلدى. ەڭ باستىسى، باۋىرلاس ەلدەردىڭ بىرلىگىن بەكەمدەي تۇستىك. ورتاق قۇندىلىقتارىمىزدى تورتكۇل دۇنيەگە تانىتتىق. ءبىز بابالار وسيەتىن ورىنداپ، تۇركى ەلدەرىنىڭ ىنتىماعىن نىعايتىپ كەلەمىز. ەندىگى ماقسات – ءوزارا سەنىم مەن باۋىرلاستىققا نەگىزدەلگەن بىرلىگىمىزدى ساقتاپ، وسكەلەڭ ۇرپاققا تابىستاۋ»، – دەگەن بولاتىن.
قورقىت اتا – ءتۇبى ءبىر تۇركى حالىقتارىنا ورتاق رۋحاني تۇلعا، ەل بىرلىگى مەن ماڭگىلىك ءومىر يدەياسىنىڭ سيمۆولى. ونىڭ دانالىعى، مۇراسى، تاعىلىمى عاسىرلار بويى رۋحاني تىرەگىمىزگە اينالىپ، ۇلت پەن ۇرپاقتىڭ جادىندا ساقتالىپ كەلەدى. بۇگىندە قورقىت مۇراسىن زەرتتەۋ – وتكەندى تانۋ عانا ەمەس، بولاشاعىمىزعا باعىتتالعان رۋحاني ميسسيا. وسى ماقساتتاعى عىلىمي ىزدەنىستەر مەن حالىقارالىق بايلانىستار تۇركى حالىقتارىنىڭ مادەني تۇتاستىعىن نىعايتۋعا، رۋحاني ۇندەستىگىن ارتتىرۋعا زور ۇلەس قوستى»، – دەدى نۇرلىبەك ماشبەك ۇلى.
كونفەرەنسيادا «تۇركى مادەنيەتى جانە مۇراسى» قورىنىڭ پرەزيدەنتى اقتوتى رايىمقۇلوۆا، ازەربايجان ۇلتتىق عىلىم اكادەمياسى فولكلور ينستيتۋتىنىڭ ديرەكتورى حيكمەت كۋلييەۆ، قازاق ۇلتتىق ۋنيۆەرسيتەتىنىڭ پروفەسسورى، فيلولوگيا عىلىمدارىنىڭ كانديداتى انارباي بۇلدىباي، قىرعىز رەسپۋبليكاسى ۇلتتىق عىلىم اكادەمياسى ش.ايتماتوۆ اتىنداعى ءتىل جانە ادەبيەت ينستيتۋتىنىڭ باس عىلىمي قىزمەتكەرى، فيلولوگيا عىلىمدارىنىڭ دوكتورى جىلدىز وروزوبەكوۆا، قاجى بايرام ۆەلي اتىنداعى انكارا ۋنيۆەرسيتەتىنىڭ پروفەسسورى مەحمەت چيەۆيك، تۇركيانىڭ بەلگىلى ەتنومۋزىكاتانۋشىسى، عالىم فيكرەت كاراكايا، وزبەكستان رەسپۋبليكاسى ۇلتتىق عىلىم اكادەمياسىنىڭ ءا.ناۋاي اتىنداعى مەملەكەتتىك ادەبيەت مۋزەيىنىڭ ديرەكتورى، فيلولوگيا عىلىمدارىنىڭ دوكتورى، پروفەسسور جوپپور ەشونكۇلوۆ، قازاقستاننىڭ ەڭبەك سىڭىرگەن قايراتكەرى، جىراۋ، ۇستاز الماس الماتوۆ، فيلولوگيا عىلىمدارىنىڭ كانديداتى راقىش جۇماشاي، ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ دوسەنتى ۇلجان بايبوسىنوۆا پىكىر ءبىلدىردى.
ايتا كەتەيىك، 2018 جىلى قورقىت اتا مۇرالارى يۋنەسكو-نىڭ ماتەريالدىق ەمەس مادەني مۇرالار تىزىمىنە ەندى. بۇگىندە ۇلى ويشىلدىڭ رۋحىنا تاعزىم ەتۋ، مۇراسىن ساقتاۋ جانە كەڭىنەن ناسيحاتتاۋ باعىتىندا جۇيەلى جۇمىس جالعاسۋدا.
بۇگىندە قارماقشى اۋدانىنداعى قورقىت اتا مەموريالى – تۋريستەردىڭ رۋحاني دەمالىس ورنى، كەشەن باسىندا كەلۋشىلەرگە بارلىق جاعداي جاسالعان. قىزىلوردا قالاسىنداعى «قورقىت اتا كىتابىنىڭ 1300 جىلدىعىنا» ارنالعان اللەيا جاڭعىرتىلىپ، تۇرعىنداردىڭ سايالى ورنىنا اينالدى. قورقىت اتا حالىقارالىق اۋەجايىنىڭ جاڭا تەرمينالى ىسكە قوسىلدى.
ورتاعاسىرلىق تاريحي-مادەني مۇرالاردى حالىقارالىق دەڭگەيدە تانىتۋ ءۇشىن ۇلتتىق مۋزەي، تۇركسوي ۇيىمى جانە تۇركيانىڭ مادەنيەت جانە تۋريزم مينيسترلىگىمەن بىرلەسكەن شارالار وتكىزىلۋدە. قازبا جۇمىستارى كەزىندە تابىلعان جادىگەرلەر نەگىزىندە «شىرىك رابات ساق جاۋىنگەرى»، «سىعاناق حانشايىمى»، «تۇگىسكەن كوسەمى»، «جەتىاسار اقسۇيەك ايەلى» مۇسىندەرى جاڭعىرتىلىپ، عىلىمي اينالىمعا ەنگىزىلدى.
