بۇگىن قىزىلوردا قالاسىندا وبلىس اكىمى نۇرلىبەك نالىبايەۆتىڭ قاتىسۋىمەن قازاقستان حالقى اسسامبلەياسىنىڭ 30 جىلدىق مەرەيتويى اياسىندا سالىنعان «دوستىق ءۇيىنىڭ» جاڭا عيماراتىنىڭ سالتاناتتى اشىلۋ ءراسىمى ءوتتى، دەپ حابارلايدى Dalanews.kz.

راسىمگە قازاقستان حالقى اسسامبلەياسى ءتوراعاسىنىڭ ورىنباسارى، قازاقستان رەسپۋبليكاسى پرەزيدەنتى اكىمشىلىگى قازاقستان حالقى اسسامبلەياسى حاتشىلىعىنىڭ مەڭگەرۋشىسى مارات ءازىلحانوۆ، پارلامەنت سەناتى مەن ءماجىلىسىنىڭ دەپۋتاتتارى رۋسلان رۇستەموۆ، ناۋرىزباي بايقاداموۆ، مۇرات ابەنوۆ، مارحابات جايىمبەتوۆ، مۇرات ەرگەشبايەۆ، ايان زەينۋللين، «قازاتومونەركاسىپ» ۇلتتىق اتوم كومپانياسىنىڭ باسقارما ءتوراعاسى مەيىرجان يۋسۋپوۆ، «سامۇرىق-قازىنا تراست» كورپوراتيۆتىك قورىنىڭ باس ديرەكتورى الفيا ادييەۆا، قۇقىق قورعاۋ ورگاندارى مەن جاۋاپتى سالالاردىڭ باسشىلارى، زيالى قاۋىم وكىلدەرى قاتىستى.

ايماق باسشىسى جاڭا عيمارات ەل يگىلىگىنە قىزمەت ەتەتىنىن ايتىپ، قۇتتىقتاۋ ءسوزىن جەتكىزدى.

«بىرلىك – حالقىمىزدىڭ تۇتاستىعى مەن ىرىس-ىنتىماعىنىڭ، ۇيلەسىمدى قارىم-قاتىناسىنىڭ، تاتۋلىعىنىڭ كورىنىسى. ەل بولۋدىڭ بىردەن-بىر العىشارتى.
وڭىرىمىزدە 30-دان استام ەتنوس وكىلدەرى ءتاتۋ-تاتتى ءومىر سۇرەدى. اسسامبلەيا جانىندا 11 ەتنومادەني بىرلەستىك ءبىر مۇددە، ءبىر ماقسات جولىندا ۇيىسىپ، ەلدىڭ بىرلىگىن ساقتاۋ باعىتىندا جۇمىس جاساۋدا.
بەرەكە-بىرلىگىمىزدىڭ ۇيىتقىسىنا اينالىپ، ەلىمىزدەگى ەتنوسارالىق دوستىق پەن بىرلىكتىڭ ۇلگىسىن الەمگە تانىتقان قازاقستان حالقى اسسامبلەياسىنىڭ قۇرىلعانىنا وتكەن جىلى 30 جىل تولدى. بۇگىندە اسسامبلەيا حالقىمىزدى بىرلىككە، دوستىققا ۇندەيتىن جالپىۇلتتىق كەلىسىمنىڭ نەگىزىنە اينالدى.
پرەزيدەنتىمىزدىڭ تاپسىرماسىنا سايكەس، وتكەن جىلى 1 مامىر – قازاقستان حالقىنىڭ بىرلىگى كۇنى وزدەرىڭىزبەن بىرگە وسى جەردە جاڭا عيماراتتىڭ ىرگەتاسىن قالاعان بولاتىنبىز.
مىنە بۇگىن، تاريحي ساتتە قايتا قاۋىشىپ، «قازاتومونەركاسىپ» ۇلتتىق اتوم كومپانياسىنىڭ دەمەۋشىلىگىمەن 3 ملرد. 800 ملن. تەڭگەگە سالىنعان «دوستىق ءۇيىنىڭ» زاماناۋي عيماراتىن ەل يگىلىگىنە تابىستاۋدامىز.
جاڭا نىساننىڭ بوي كوتەرۋىنە دەمەۋشىلىك جاساعانى ءۇشىن «سامۇرىق-قازىنا» اكسيونەرلىك قوعامىنىڭ باسقارما ءتوراعاسى جاقىپوۆ نۇرلان قارشىعاۇلىنا، ۇلتتىق اتوم كومپانياسىنىڭ باسقارما ءتوراعاسى يۋسۋپوۆ مەيىرجان باقىتۇلىنا بارشا سىر جۇرتشىلىعى، ءوزىمنىڭ اتىمنان شىنايى العىسىمدى، زور ريزاشىلىعىمدى بىلدىرەمىن!
جالپىۇلتتىق تۇراقتىلىق پەن قوعامدىق كەلىسىمنىڭ قاينار بۇلاعى – قازاقستان حالقى اسسامبلەياسىنىڭ 30 جىلدىعى اياسىندا بوي كوتەرگەن، دوستىق پەن كەلىسىمنىڭ نىشانىنا اينالاتىن جاڭا عيمارات بارشاڭىزعا قۇتتى بولسىن!»، – دەدى ن.نالىبايەۆ.

سالتاناتتى راسىمدە بىرلىك پەن كەلىسىمنىڭ نىعايۋىنا ەلەۋلى ۇلەس قوسقان اسسامبلەيا مۇشەلەرى مەن جاڭا عيماراتتى ساپالى ەتىپ سالعان مەردىگەر مەكەمە وكىلدەرى وبلىستىڭ ەڭ جوعارعى ناگراداسى – قىزىلوردا وبلىسىنىڭ قۇرمەت گراموتاسىمەن، وبلىس اكىمىنىڭ العىس حاتىمەن ماراپاتتالدى. مارات ءازىلحانوۆ، مۇرات ابەنوۆ جانە مەيىرجان يۋسۋپوۆ قۇتتىقتاۋ ءسوز سويلەپ، ىزگى تىلەكتەرىن جەتكىزدى.

ايتا كەتەيىك، بۇل – بىرلىك مەن ىنتىماقتى نىعايتۋعا اتسالىسقان ەتنومادەني بىرلەستىكتەر مەن اسسامبلەيا بەلسەندىلەرى ءۇشىن بارلىق قاجەتتىلىكتەرمەن قامتاماسىز ەتىلگەن زامانۋي عيمارات. مۇندا ەتنومادەني بىرلەستىكتەردىڭ، وبلىستىق، قالالىق ارداگەرلەر كەڭەسىنىڭ، ازاماتتىق اليانس وكىلدەرىنىڭ دە تولىق جابدىقتالعان جۇمىس كابينەتتەرى بار. قالا ساۋلەتىنە ءسان قوسقان جاڭا عيماراتتاعى 200 ورىندىق كونسەرتتىك، 50 ورىندىق اكت زالدارىندا مادەني-رۋحاني شارالار ۇيىمداستىرۋعا بولادى. شىعارماشىل جاستارعا ارنالعان دومبىرا، ءان، بي ۇيىرمەلەرىنە، مەدياسيا ورتالىعى، مۋزەي، اسسامبلەيا جانىنداعى عىلىمي ساراپشىلىق توپتارعا دا جاعداي جاسالعان.

«دوستىق ءۇيى» ازاماتتىق قوعام ينستيتۋتتارىنىڭ باسىن قوساتىن، جاڭا باستامالاردى ىلگەرىلەتەتىن ورتالىققا اينالماق.