قىزىلوردا وبلىسىندا ددۇ-نىڭ ارال تەڭىزى ماسەلەلەرى جونىندەگى وڭىرلىك كەڭسەسى اشىلادى. مۇنداي شەشىم دۇنيەجۇزىلىك دەنساۋلىق ساقتاۋ ۇيىمى، بۇۇ وكىلدەرىنىڭ، سونداي-اق قازاقستان، وزبەكستان باسشىلارىنىڭ قاتىسۋىمەن وتكەن كەڭەستىڭ قورىتىندىسى بويىنشا قابىلداندى، دەپ حابارلايدى Dalanews.kz.
قاتىسۋشىلار ەكولوگيالىق وزگەرىستەردىڭ اۋقىمىن جانە ولاردىڭ ادام دەنساۋلىعىنا، كليماتقا جانە بيوارتۇرلىلىككە اسەرىن تالقىلادى.
كەزدەسۋ قورىتىندىسى بويىنشا مىناداي ءبىرقاتار ماڭىزدى شەشىمدەر قابىلداندى:
-قىزىلوردادا ددۇ-نىڭ ارال تەڭىزى ماسەلەلەرى جونىندەگى وڭىرلىك ءوفيسىن اشۋ؛
-مەملەكەتارالىق دەڭگەيدەگى ءىس-قيمىلداردىڭ جول كارتاسىن دايىنداۋ جانە بەكىتۋ؛
-2026 جىلى ددۇ ءساۋىر سامميتىنە ارال بويىنشا قارار شىعارۋ.
ارال تەڭىزى پروبلەماسى حح عاسىرداعى ەڭ ءىرى ەكولوگيالىق داعدارىستاردىڭ ءبىرى رەتىندە تانىلدى، ونىڭ سالدارىن ارال ماڭىنداعى تۇرعىندار سەزىنۋدە. ونداعان جىلدار بويى ءوڭىر شولەيتتەنۋگە، توپىراقتىڭ دەگراداسياسىنا، ۋلى شاڭنىڭ تارالۋىنا جانە حالىقتىڭ دەنساۋلىعىنا تىكەلەي اسەر ەتەتىن باسقا دا قيىندىقتارعا تاپ بولدى.
سونىمەن قاتار، سوڭعى جىلدارى جاعدايدى تۇراقتاندىرۋ بويىنشا ماڭىزدى قادامدار جاسالدى. بىرلەسكەن كۇش-جىگەردىڭ ارقاسىندا تەڭىزدىڭ سولتۇستىك بولىگىنىڭ كەبۋىن توقتاتۋعا مۇمكىندىك تۋدى، كەۋىپ قالعان اۋماقتاردى اۋقىمدى كوگالداندىرۋ جۇرگىزىلۋدە، سونداي-اق اپاتتىڭ تەرىس اسەرىن ازايتۋ جونىندەگى جوبالار ىسكە اسىرىلۋدا.
مەملەكەتتىك ورگاندار مەن حالىقارالىق ارىپتەستەردىڭ ۇيلەسىمدى جۇمىسىنىڭ ارقاسىندا بۇگىندە وڭ ديناميكا بايقالادى. مەملەكەت باسشىسىنىڭ قولداۋى جانە ءوڭىر اكىمىنىڭ جەكە قاتىسۋى ونداعان جىلدار بويى جيناقتالعان پروبلەمالاردىڭ شەشىمىن تاباتىنىنا سەنىمدىلىكتى نىعايتادى.
