سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ سۋدىڭ «كولەڭكەلى نارىعىنا» قارسى كۇرەس ماسەلەلەرى بويىنشا اپپارات وتىرىسىن وتكىزدى. قىزىلوردا وبلىسىندا التى شارۋا قوجالىعىنىڭ سۋدى زاڭسىز پايدالانعانى انىقتالدى،- دەپ حابارلايدى Dalanews.kz
بيىل ۆەگەتاسيالىق كەزەڭ باستالعالى بەرى وڭىردە رۇقساتسىز الىنعان سۋدىڭ كولەمى 2،3 ملن تەكشە مەتردەن اسقان. بۇل سۋدىڭ بارلىعى كۇرىش القاپتارىن سۋارۋعا پايدالانىلعان. وتكەن اپتاداعى اپپارات وتىرىسىندا سۋ رەسۋرستارى جانە يرريگاسيا مينيسترلىگىنىڭ ماماندارىنان ءتورت جۇمىس توبى قۇرىلعان بولاتىن. بۇل توپتار قازاقستاننىڭ وڭتۇستىك وبلىستارىندا سۋدى زاڭسىز پايدالانۋ فاكتىلەرىن تەكسەرىپ قانا قويماي، سۋ ۇنەمدەۋ، رەتتەۋ جانە اۋىل شارۋاشىلىعى تاۋار وندىرۋشىلەرىنە سۋ جەتكىزۋ ماسەلەلەرى بويىنشا مونيتورينگ جۇرگىزىپ جاتىر.
ەسكە سالا كەتسەك، بۇعان دەيىن ارال-سىرداريا باسسەيندىك ينسپەكسياسىنىڭ ماماندارى شاردارا اۋدانى پروكۋراتۋراسىمەن بىرلەسىپ، تۇركىستان وبلىسىندا تىركەلمەگەن 24 سورعى قوندىرعىسىن انىقتاعان بولاتىن.
«سۋ ۇنەمدەۋ مەن سۋارمالى سۋدى دۇرىس ۇلەستىرۋدى قامتاماسىز ەتۋ ماقساتىندا بيىل «قازسۋشار» كاسىپورنىمەن ءتيىستى كەلىسىمشارتقا وتىرعان شارۋا قوجالىقتارىنا عانا سۋ بەرىلەدى. جەرگىلىكتى جەرلەردە تەكسەرۋلەر مىندەتتى تۇردە جالعاسادى جانە سۋدى زاڭسىز پايدالانۋ فاكتىلەرىنىڭ ءبارى انىقتالىپ، زاڭ بۇزعاندار جاۋاپكەرشىلىككە تارتىلادى. جاڭا جىلدان باستاپ شارۋالارمەن سۋ بەرۋ تۋرالى كەلىسىمشارتتار تەك ەلەكتروندى فورماتتا جاسالۋى ءتيىس. بارلىق كەلىسىمشارتتى ونلاين جۇيە ارقىلى تەكسەرىپ، كەلىسىلگەن كولەمدەگى سۋدىڭ بەرىلىپ جاتقانىن جانە كورسەتىلگەن داقىلداردىڭ راسىمەن ءوسىرىلىپ جاتقانىن باقىلاپ وتىرۋ ءۇشىن وسى ماسەلەنى پىسىقتاۋ قاجەت»،– دەدى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.
