قىزىلوردا وبلىسىنىڭ مەملەكەتتىك ساتىپ الۋ باسقارماسى الدىمەن مەردىگەردى «ءادiلەتسىز قاتىسۋشى» دەپ تانىپ، ارتىنشا وعان تەندەردى بەرگەن. بۇل تۋرالى جوعارعى سوت مالىمدەدى، دەپ حابارلايدى Dalanews.kz.
شيەلى اۋدانىنداعى ءبىر مەكتەپكە اسحانانى ۇيىمداستىراتىن جەتكىزۋشى ىزدەستىرىلگەن. بايقاۋعا قاتىسقان جەكە كاسىپكەردىڭ ءوتىنىمى ەڭبەك رەسۋرستارى جەتكىلىكسىز دەگەن سەبەپپەن قابىلدانباعان. الايدا كاسىپكەر كونكۋرس قۇجاتتارىنا ساي ءتورت اسپاز بەن تاعى ءتورت قىزمەتكەرى بار ەكەنىن راستايتىن قۇجاتتاردى ۇسىنعان.
كاسىپكەر وبلىستىق مەملەكەتتىك ساتىپ الۋ باسقارماسىن سوتقا بەرگەن. سوت پروسەسى كەزىندە بايقاۋدا جەڭىمپاز اتانعان ءجشس-نىڭ بۇعان دەيىن مەملەكەتتىك ساتىپ الۋعا قاتىسۋ قۇقىعىنان ايىرىلعانى بەلگىلى بولدى.
“بۇل شەشىم قورىتىندى حاتتاماعا قول قويىلعانعا ءبىر اپتا قالعاندا زاڭدى كۇشىنە ەنگەن. ايتا كەتەرلىگى، ول ءىستى قوزعاعان دا وسى مەملەكەتتىك ساتىپ الۋ باسقارماسىنىڭ ءوزى… سوت جەكە كاسىپكەردىڭ ءوتىنىمىن قابىلداماۋ زاڭسىز دەپ تاپتى”، – دەلىنگەن حابارلامادا.
ناتيجەسىندە مەكتەپ پەن ج ش س اراسىنداعى مەملەكەتتىك ساتىپ الۋ شارتى جارامسىز دەپ تانىلدى. سوت ءوڭىر اكىمىنە ءتيىستى شارالار قابىلداۋ تۋرالى جەكە ۇيعارىم جولدادى.
