ەڭبەك ەرلەرى تاۋەلسىزدىك دەپ سوققان جۇرەك تۇسىنا وتارشىلدىق سيمۆولى – قىزىل جۇلدىزدى قالاي تاعادى؟
ادامزات ءۇشىن ادال ەڭبەكتەن ارتىق نە بار دەيسىز؟ ماڭداي تەردەن مارجان تامشىلاتقان ماڭدايالدى مارعاسقالار ماراپاتتىڭ قاندايىنا دا لايىق! ەڭبەكتىڭ نارقى مەن پارقى، جەمىسى مەن جەتىستىگى اتام زاماننان ايرىقشا قۇمەتپەن ايشىقتالىپ كەلەدى. كەشەگى كەڭەس كەزەڭىنىڭ وزىندە ەڭبەكشىلەرگە ەرەكشە قۇرمەت كورسەتىلدى. تاۋەلسىز قازاق ەلى دە ەڭبەككە زور ءمان بەرىپ، ەڭبەك ادامىن قۇرمەتتەۋدە ەشكىمنەن كەم ەمەس. ەلباسىمىزدىڭ ءبىر جولداۋى دا تۇگەل ەڭبەكتىڭ ەرەكشە رولىنە ارنالعانى بەلگىلى.
“اق جول” پارتياسىنىڭ دەپۋتاتتىق ءبىر ساۋالى ەڭبەك ادامىن قۇرمەتتەۋ ءۇشىن ەڭبەك داڭقى وردەنىن شىعارۋ بولاتىن. اقجولدىقتاردىڭ بۇل ۇسىنىسى اقجولتاي بولدى – ۇكىمەت بىردەن قولداپ شىعا كەلدى. اقىرى، سونىڭ ناتيجەسى – بۇگىنگى “ەڭبەك داڭقى” وردەنى.
“باقسام، باقا ەكەن”-دەگەندەي، “ەڭبەك داڭقى” وردەنىنىڭ بەكىتىلگەن نۇسقاسىن كورىپ، الىپ ۇشقان كوڭىلىمىز سۋ سەپكەندەي باسىلدى. تاۋەلسىز قازاقستاننىڭ ەڭبەك ادامىنىڭ توسىنە تاعىلار وردەن – “قىزىل جۇلدىز” بەلگىسى ەكەن… ءيا، كەشەگى ەلىمىزدى وتارلاۋشى كەڭەس وداعىنىڭ قىزىل جۇلدىزى! قىزىل قىرعىندى جاساۋشى قىزىل ارميانىڭ قىزىل جۇلدىز ەمبلەماسى!
“اجەپتاۋىر ءان ەدى، پۇشىق شىركىن ءبۇلدىردى” -دەگەندەي، پرەزيدەنت جانىنداعى مەملەكەتتىك كوميسسيا مۇشەلەرى قايدا قاراعان؟ “بۇل نە ماسقارا؟!-دەيتىن قۇلدىق سانادان قۇتىلعان ءبىر ادام تابىلماعانى ما؟ كوميسسيا ءتورايىمى – مەملەكەتتىك حاتشى گۇلشارا ءابدىحالىقوۆا حانىم بۇعان قالاي جول بەرىپ وتىر؟
ەرتەڭ ەڭبەك ەرلەرى تاۋەلسىزدىك دەپ سوققان جۇرەك تۇسىنا وتارشىلدىق سيمۆولى – قىزىل جۇلدىزدى قالاي تاعادى؟
مىنا كەڭەس وداعى كەزىندەگى وردەندەر مەن ءبىزدىڭ تاۋەلسىز قازاق ەلىنىڭ “ەڭبەك داڭقى” وردەنىن سالىستىرىپ قاراساڭىز، باياعى “الەكساندر نيەۆسكيي”، “قىزىل جۇلدىز” وردەندەرىنەن بەرى تۇك وزگەرىس جوق، زاڭدى جالعاسى سياقتى… قانداي قورقىنىشتى ەدى!؟.
ءتۇرلى سالاداعى ەڭبەك ۇزدىكتەرى اسا جوعارى كورسەتكىشتەرى ءۇشىن ناگرادتالاتىن «ەڭبەك داڭقى» وردەنى ءۇش دارەجەدەن تۇرادى. «ەڭبەك داڭقى» وردەنىنىڭ ءۇش دارەجەسىنىڭ يەگەرلەرى مارتەبەسى بويىنشا «قازاقستاننىڭ ەڭبەك ەرى» اتاعىنا يە بولعان ادامدارعا تەڭەستىرىلەدى. مۇنداي ەلىمىز بويىنشا ەرەكشە ماڭىزدى ءرول اتقاراتىن ماراپاتتىڭ بەلگىسىن تاڭداۋ ءۇشىن رەسپۋبليكالىق كونكۋرس جاريالاۋ كەرەك ەمەس پە؟ ءبىر جىل عانا بولاتىن مەرەكەلەردىڭ
ەمبلەمالارىنىڭ وزىنە بايقاۋ جاريالاپ جاتامىز، ال ماڭگىلىك ەلدىڭ ماڭگىلىك ماراپاتى بولماق وردەنىمىزدى ومباي-دومبايلاپ جاساي سالعانىمىزدى قالاي تۇسىنەمىز…
ماماندىعى سۋرەتشى اقىن رەتىندە ايتارىم، ورىندالۋى دا سۇرەڭسىز، قارابايىر، ەڭسەڭدى ەزىپ تۇراتىن ۇيلەسىمسىز تۇستەر (كوك پەن قاراكۇرەڭ ءتۇس بىر-بىرىمەن ۇيلەسپەيدى) جارقىن ماراپاتتى ەمەس، جانشىلعان ماشاقاتتى بىلدىرەتىندەي… قىزىل يمپەريانىڭ “قىزىل جۇلدىزدى” وردەندەرىن ناشار كوشىرە سالعان مىنا مەملەكەتتىك ماراپاتتان قازىرگى كەز-كەلگەن قوعامدىق ۇيىمداردىڭ شىعارىپ جۇرگەن وردەن-مەدالدارى كوش ىلگەرى! مىسالى، “ءتىل جاناشىرى” بەلگىسى جارقىراپ-اق تۇر…
ەڭبەك ادامىنىڭ ەڭسەسىن ەزەتىن “قىزىل جۇلدىزدى ” قىزۋ ەڭبەكتىڭ ايقىن بەلگىسى – بەرەكەنى كورسەتەتىن بەلگىلەرمەن اۋىستىرۋ كەرەك ءدۇر!
قازىبەك يسا
qazaquni.kz
