Eńbek erleri Táýelsizdik dep soqqan júrek tusyna otarshyldyq sımvoly – Qyzyl juldyzdy qalaı taǵady?
Adamzat úshin adal eńbekten artyq ne bar deısiz? Mańdaı terden marjan tamshylatqan mańdaıaldy marǵasqalar marapattyń qandaıyna da laıyq! Eńbektiń narqy men parqy, jemisi men jetistigi atam zamannan aıryqsha qumetpen aıshyqtalyp keledi. Keshegi Keńes kezeńiniń ózinde eńbekshilerge erekshe qurmet kórsetildi. Táýelsiz Qazaq Eli de Eńbekke zor mán berip, eńbek adamyn qurmetteýde eshkimnen kem emes. Elbasymyzdyń bir Joldaýy da túgel Eńbektiń erekshe róline arnalǵany belgili.
“Aq jol” partıasynyń depýtattyq bir saýaly Eńbek adamyn qurmetteý úshin Eńbek dańqy ordenin shyǵarý bolatyn. Aqjoldyqtardyń bul usynysy aqjoltaı boldy – Úkimet birden qoldap shyǵa keldi. Aqyry, sonyń nátıjesi – búgingi “Eńbek Dańqy” ordeni.
“Baqsam, baqa eken”-degendeı, “Eńbek Dańqy” ordeniniń bekitilgen nusqasyn kórip, alyp ushqan kóńilimiz sý sepkendeı basyldy. Táýelsiz Qazaqstannyń eńbek adamynyń tósine taǵylar orden – “Qyzyl juldyz” belgisi eken… Iá, keshegi elimizdi otarlaýshy Keńes Odaǵynyń Qyzyl juldyzy! Qyzyl qyrǵyndy jasaýshy Qyzyl Armıanyń Qyzyl juldyz emblemasy!
“Ájeptáýir án edi, pushyq shirkin búldirdi” -degendeı, Prezıdent janyndaǵy memlekettik komısıa músheleri qaıda qaraǵan? “Bul ne masqara?!-deıtin quldyq sanadan qutylǵan bir adam tabylmaǵany ma? Komısıa tóraıymy – Memlekettik hatshy Gúlshara Ábdihalyqova hanym buǵan qalaı jol berip otyr?
Erteń Eńbek erleri Táýelsizdik dep soqqan júrek tusyna otarshyldyq sımvoly – Qyzyl juldyzdy qalaı taǵady?
Myna Keńes odaǵy kezindegi ordender men bizdiń táýelsiz Qazaq eliniń “Eńbek Dańqy” ordenin salystyryp qarasańyz, baıaǵy “Aleksandr Nevskıı”, “Qyzyl juldyz” ordenderinen beri túk ózgeris joq, zańdy jalǵasy sıaqty… Qandaı qorqynyshty edi!?.
Túrli saladaǵy eńbek úzdikteri asa joǵary kórsetkishteri úshin nagradtalatyn «Eńbek Dańqy» ordeni úsh dárejeden turady. «Eńbek Dańqy» ordeniniń úsh dárejesiniń ıegerleri mártebesi boıynsha «Qazaqstannyń Eńbek Eri» ataǵyna ıe bolǵan adamdarǵa teńestiriledi. Mundaı elimiz boıynsha erekshe mańyzdy ról atqaratyn marapattyń belgisin tańdaý úshin respýblıkalyq konkýrs jarıalaý kerek emes pe? Bir jyl ǵana bolatyn merekelerdiń
emblemalarynyń ózine baıqaý jarıalap jatamyz, al Máńgilik Eldiń máńgilik marapaty bolmaq ordenimizdi ombaı-dombaılap jasaı salǵanymyzdy qalaı túsinemiz…
Mamandyǵy sýretshi aqyn retinde aıtarym, oryndalýy da súreńsiz, qarabaıyr, eńseńdi ezip turatyn úılesimsiz túster (kók pen qarakúreń tús bir-birimen úılespeıdi) jarqyn marapatty emes, janshylǵan mashaqatty bildiretindeı… Qyzyl ımperıanyń “qyzyl juldyzdy” ordenderin nashar kóshire salǵan myna memlekettik marapattan qazirgi kez-kelgen qoǵamdyq uıymdardyń shyǵaryp júrgen orden-medaldary kósh ilgeri! Mysaly, “Til janashyry” belgisi jarqyrap-aq tur…
Eńbek adamynyń eńsesin ezetin “qyzyl juldyzdy ” qyzý eńbektiń aıqyn belgisi – berekeni kórsetetin belgilermen aýystyrý kerek dúr!
Qazybek ISA
qazaquni.kz
