«قىزدار ۋنيۆەرسيتەتى – تازا ايماق» جالپىۋنيۆەرسيتەتتىك سەنبىلىكتىڭ وتۋىنە وقۋ ورنىنىڭ بىلىمگەرلەرى ۇيىتقى بولىپ، ىقىلاس تانىتقان. جاستار وسىلايشا قازىنالى قاراشاڭىراقتىڭ كوركەيۋىنە، اسەم كەلبەتىن ساقتاۋىنا وزىندىك ۇلەستەرىن قوسپاق.
شاراعا قاتىسۋشىلار قوقىستى جينايتىن ارنايى جابدىقتارمەن، قولعاپتارمەن جانە قاپتارمەن قامتاماسىز ەتىلدى.
ءبىلىم ورداسىن سانيتارلىق تازالاۋعا، اباتتاندىرۋ مەن كوگالداندىرۋعا باعىتتالعان سەنبىلىك بارىسىندا بارلىق فاكۋلتەت ستۋدەنتتەرى بەكىتىلگەن اۋماقتارىن تازالاپ، وقۋ عيماراتتارى مەن جاتاقحانالار ماڭىنداعى اعاشتاردى ارلەدى.
– باستى ماقساتىمىز – ۋنيۆەرسيتەت ۇجىمى مەن ستۋدەنتتەرىنىڭ نازارىن وقۋ ورنىنىڭ اۋماعىن تازا ۇستاۋعا جانە ەكولوگيالىق مادەنيەتىن قالىپتاستىرۋعا اۋدارۋ. سەنبىلىكتى وتكىزۋ ءداستۇرى بۇگىنگى قوعامنىڭ اجىراماس بولىگىنە اينالۋى ءتيىس دەپ ويلايمىز. وسى تاقىلەتتەس ءىس-شارالار ادامدى، اسىرەسە، ءبىز سياقتى جاستاردى تاربيە مەن تارتىپكە باۋليدى. قازاقستاننىڭ تۇڭعىش پرەزيدەنتى وتانداستارىمىزدى جالپىعا ورتاق ەڭبەك قوعامى بولۋعا شاقىردى. مىنە، ەلباسىنىڭ باستاماسىن قولداپ-قۋاتتاۋدى ناقتى ءىس جۇزىندە كورسەتۋ وسىنداي جۇمىستاردان اڭعارىلادى، – دەيدى قىزدار ۋنيۆەرسيتەتىنىڭ ستۋدەنتتەرى.
جاستاردىڭ پايىمداۋىنشا، مۇنداي اكسيالار بارىسىندا ورتاقتاسىپ ەڭبەك ەتۋ كوپشىل بولۋعا، بىر-بىرىنە ىقىلاس تانىتۋعا داعدىلاندىرادى.
سونىمەن قاتار ءىس-شارالار اياسىندا ۋنيۆەرسيتەتتىڭ سپورت كەشەنى مەن جاتاقحانالارىندا سپورتتىق ويىنداردان جارىستار ءوتتى. اتاپ ايتقاندا، ستۋدەنتتەر شاحمات، دويبى، توعىزقۇمالاق ويىندارى بويىنشا باقتارى مەن باپتارىن سىناپ، ءوزارا مىقتىنى انىقتادى. سونداي-اق بي جارىستارى دا ۇيىمداستىرىلدى. سايىستاردا «جۇزدەن – جۇيرىك، مىڭنان – تۇلپار» شىققاندار «العىس حاتتارمەن»، كۋبوكتارمەن ماراپاتتالدى.
جوبا شەڭبەرىندە وقۋ ورنىنىڭ پروفەسسور-وقىتۋشىلارى جاتاقحانالاردا ءتۇرلى تاقىرىپتاردا سەمينار-ترەنينگتەر مەن پىكىرسايىستار جانە سىر-سۇحباتتار وتكىزدى جيىنعا قاتىسۋشىلار «ستۋدەنتتەر اراسىندا كوممۋنيكاتيۆتى بايلانىستى ارتتىرۋ»، «ءتىل تازالىعى ۇلت مادەنيەتىنىڭ ايناسى»، «ۇلتتار دوستىعى – قوس جۇرەكتىڭ شاتتىعى» (ءار ءتۇرلى ۇلت وكىلدەرىنىڭ نەكەلەسۋىنە جاستاردىڭ كوزقاراسى)، «مەن جاستارعا سەنەمىن»، «ۇستاز – ۇلتتىڭ شامشىراعى»، «قىز تاربيەسى – ۇلت تاربيەسى»، «پاتريوتيزم – ۇلتتىق رۋحتىڭ اسقاق بەلگىسى» تاقىرىپتارى توڭىرەگىندە وزىندىك ويلارىمەن ءبولىستى، كەلەلى كەڭەستەر ايتتى، پايىمدى پىكىرلەرىن ءبىلدىردى.
قازاق ۇلتتىق قىزدار پەداگوگيكالىق ۋنيۆەرسيتەتىنىڭ الەۋمەتتىك-تاربيە جۇمىسى جانە جاستار ساياساتى ءبولىمىنىڭ مالىمەتىنە سۇيەنەر بولساق، بۇگىن وقۋ ورنىندا جالپى سانى 25 ءىس-شارا ءوتتى. وعان فاكۋلتەتتەر مەن جاتاقحانالار ۇجىمدارى جانە ستۋدەنتتەردىڭ ءوزىن-وزى باسقارۋ ۇيىمدارى بەلسەنە ات سالىسقان.
قازاق ۇلتتىق قىزدار پەداگوگيكالىق ۋنيۆەرسيتەتىنىڭ
باسپا ءسوز جانە قوعاممەن بايلانىس ءبولىمى
